បន្ទាប់ពីអញ្ជើញចូលរួមពិធីបើកធ្វើសន្និសីទប្រចាំឆ្នាំ២០១៨នៃវេទិកាអាសក្រុងប៉អៅលោកស៊ីជីនភីង ប្រធានរដ្ឋចិនបានជួបពិភាក្សាការងារជាមួយថ្នាក់ដឹកនាំបរទេសជាច្រើនរូបនៅក្រុងប៉អៅ ខេត្តហៃណានកាលពីរសៀលថៃ្ងទី១០ ខែមេសា ដែលរួមមានលោកAbbasi នាយករដ្ឋមន្រ្តីប៉ាគីស្ថាន លោកUkhnaagiin Khurelsukh នាយករដ្ឋមន្រ្តីម៉ុងហ្គោលីនិងលោក Duterte ប្រធានាធិបតីហ្វីលីពីនជាដើម។
ក្នុងពេលជួបពិភាក្សាការងារជាមួយលោក Abbasi នាយករដ្ឋមន្រ្តីប៉ាគីស្ថាន លោកស៊ីជីនភីងបានលើកឡើងថា ប្រទេសចិនរីករាយរួមសហការជាមួយភាគីប៉ាគីស្ថានដើម្បីបន្តផ្តល់ការគាំទ្រដល់គ្នាទៅវិញទៅមក ធ្វើឱ្យកាន់តែស៊ីជម្រៅនូវការរួមបញ្ជូលផលប្រយោជន៍គ្នាព្រមទាំងបង្កើតឱ្យមានសហគមន៍រួមវាសនារវាងចិននិងប៉ាគីស្ថានដែលកាន់តែជិតស្និទ្ធថែមទៀត។
ជាការឆ្លើយតប លោក Abbasi បានថែ្លងថា ប្រទេសប៉ាគីស្ថានបានប្រកាន់ខ្ជាប់យ៉ាងម៉ឺងម៉ាត់នូវគោលនយោបាយចិនតែមួយ ហើយបានផ្តល់ការគាំយ៉ាងមុតមាំចំពោះបញ្ហាពាក់ព័ន្ធនឹងផលប្រយោជន៍ជាស្នូលរបស់ចិននិងបញ្ហាសំខាន់ៗដែលយកចិត្តទុកដាក់ដូចគ្នា។
ពេលជួបពិភាក្សាការងារជាមួយលោក Ukhnaagiin Khurelsukh នាយករដ្ឋមន្រ្តីម៉ុហ្គោលីលោកស៊ីជីនភីងបានលើកឡើងថា ប្រទេសចិនរីករាយរួមសហការជាមួយភាគីម៉ុងហ្គោលីធ្វើការផ្លាស់ប្តូរមតិយោបល់គ្នានិងកិច្ចសហប្រតិបត្តិការជាក់ស្តែងលើគ្រប់វិស័យដើម្បីជំរុញទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយរវាងចិននិងម៉ុហ្គោលីឲ្យវិវឌ្ឍរីកចម្រើនដើម្បីផ្តល់ផលប្រយោជន៍ដល់ប្រជាជននៃប្រទេសទាំងពីរ។
ជាការឆ្លើយតប លោក Ukhnaagiin Khurelsukh បានថែ្លងថា ម៉ុងហ្គោលីគាំទ្រលើគំនិតផ្តួចផ្តើមខ្សែក្រវាត់មួយនិងផ្លូវមួយ រីករាយបង្កើនការតភ្ជាប់គ្នានូវយុទ្ធសាស្ត្រអភិវឌ្ឍន៍ព្រមទាំងកិច្ចសហប្រតិបត្តិការលើគ្រប់វិស័យរវាងម៉ុងហ្គោលីនិងចិន។ភាគីម៉ុងហ្គោលីសូមកោតសរសើរភាគីចិនលើការរួមចំណែកដ៏សំខាន់ក្នុងការគាំពារសន្តិភាពនិងស្ថិរភាពនៅឧបទ្វីបកូរ៉េព្រមទាំងតំបន់អាស៊ីឦសានផងដែរ៕