ថ្ងៃទី២២ខែមីនា លោកត្រាំប្រធានាធិបតីអាមេរិកបានចុះហត្ថលេខាលើអនុស្សរណៈ ដោយប្រកាសថានឹងយកពន្ធគយក្នុងទ្រង់ទ្រាយធំចំពោះផលិតផលនាំចូលពីចិន ព្រមនិងដាក់កំហិតចំពោះសហគ្រាសចិនក្នុងការវិនិយោគនិងប្រមូលទិញសហគ្រាសនៅអាមេរិកទៀតផង។ ពេលឆ្លើយតបនឹងរឿងនេះ លោកស្រីហួឈុនយីងអ្នកនាំពាក្យក្រសួងការបរទេសចិនបានថ្លែងថា ប្រទេសចិនបានត្រៀមខ្លួនរួចជាស្រេច នឹងការពារសិទ្ធិនិងផលប្រយោជន៍ស្របច្បាប់របស់ខ្លួនយ៉ាងដាច់ខាត។
លោកស្រីហួឈុនយីងបានថ្លែងក្នុងសន្និសីទកាសែតជាប្រចាំនាថ្ងៃដដែលនោះថា ភាគីអាមេរិកមិនអើពើនឹងការពិតដែលប្រទេសចិនបង្កើនការការពារកម្មសិទ្ធិបញ្ញា មិនអើពើនឹងច្បាប់កំណត់នៃអង្គការពាណិជ្ជកម្មពិភពលោក និងមិនអើពើនឹងសំឡេងអំពាវនាវនៃមជ្ឈដ្ឋានពាណិជ្ជកម្មទូទៅ ប្រព្រឹត្តតាមតែទំនើងចិត្តរបស់ខ្លួន នេះគឺជាគំរូជាក់ស្តែងនៃទង្វើឯកតោភាគីនិយមនិងការគាំពារពាណិជ្ជកម្មនិយម ប្រទេសចិនប្រឆាំងយ៉ាងដាច់ខាត។ ទោះនៅក្រោមសភាពការណ៍យ៉ាងណាក្តី ក៏ប្រទេសចិននឹងមិនអនុញ្ញាតឲ្យសិទ្ធិនិងផលប្រយោជន៍ស្របច្បាប់របស់ខ្លួនរងការខូចខាតនោះដែរ យើងបានត្រៀមលក្ខណៈយ៉ាងពេញលេញរួចជាស្រេច ដើម្បីគាំពារសិទ្ធិនិងផលប្រយោជន៍ស្របច្បាប់របស់ខ្លួនយ៉ាងដាច់ខាត។
តាមដំណឹងឲ្យដឹងថា ក្រោយពីលោកត្រាំចុះហត្ថលេខាលើអនុស្សារណៈ លោកណាវ៉ារ៉ូប្រធានគណៈកម្មាធិការពាណិជ្ជកម្មជាតិនៃសេតវិមានអាមេរិកបានអះអាងថា ក្នុងទំនាក់ទំនងពាណិជ្ជកម្មរវាងអាមេរិកនិងចិន ប្រទេសចិនទទួលបានផលប្រយោជន៍ច្រើនជាងអាមេរិកឆ្ងាយណាស់ ហេតុដូច្នេះប្រទេសចិននឹងពិបាកធ្វើសេចក្តីសម្រេចស្តីពីធ្វើការសងសឹកចំពោះអាមេរិកវិញ។ ទាក់ទិននឹងប្រការនេះ លោកស្រីហួឈុនយីងបានថ្លែងថា ពាក្យសម្តីពាក់ព័ន្ធរបស់បុគ្គលអាមេរិកបានវិនិច្ឆ័យខុសចំពោះស្ថានការណ៍ជាក់ស្តែងហើយ ពោលគឺជាំការមើលស្រាលលើការប្តេជ្ញាចិត្តនិងសមត្ថកិច្ចរបស់ប្រទេសចិនក្នុងការគាំពារសិទ្ធនិងផលប្រយោជន៍ ស្របច្បាប់របស់ខ្លួន ព្រមនិងការត្រូវបង់តម្លៃជាដាច់ខាតចំពោះការប្រព្រឹត្តតាមទំនើងចិត្តរបស់ភាគីអាមេរិក៕
