នៅព្រឹកថ្ងៃទី ២៤ ខែមីនា លោកLiu He ឧបនាយករដ្ឋមន្រ្តីចិន ប្រធាននៃការិយាល័យហិរញ្ញវត្ថុមជ្ឈិមចិន និងជាមេដឹកនាំភាគីចិននៃកិច្ចសន្ទនាគ្រប់ជ្រុងជ្រោយអំពីសេដ្ឋកិច្ចរវាងចិននិងអាមេរិក បានជួបសន្ទនាតាមទូរស័ព្ទជាមួយលោកSteven Terner Mnuchin រដ្ឋមន្រ្តីក្រសួងហិរញ្ញវត្ថុអាមេរិកតាមការណាត់ ។
ក្នុងកិច្ចសន្ទនា លោក Mnuchin បានថ្លែងពីស្ថានការណ៍ថ្មីបំផុតនៃករណីដែលភាគីអាមេរិកបានប្រកាសរបាយការណ៍ត្រួតពិនិត្យលេខ ៣០១ ។ លោកLiu He បានឆ្លើយតបថា ពេលថ្មីៗកន្លងមកនេះ ភាគីអាមេរិកបានចេញរបាយការណ៍ត្រួតពិនិត្យលេខ ៣០១ ។ ប្រការនេះបានល្មើសនឹងក្រឹត្យក្រមពាណិជ្ជកម្មអន្តរជាតិ ប៉ះពាល់ដល់សិទ្ធិនិងផលប្រយោជន៍របស់ប្រទេសចិន ក៏ដូចជាសិទ្ធិនិងផលប្រយោជន៍របស់អាមេរិក រហូតដល់ទូទាំងពិភពលោកផងដែរ ។ ប្រទេសចិនបានត្រៀមខ្លួនជាស្រេចទៅហើយ និងមានកម្លាំងជាក់ស្តែងសម្រាប់គាំពារសិទ្ធិនិងផលប្រយោជន៍នៃប្រទេសជាតិ សង្ឃឹមថា ភាគីទាំងពីរអាចរក្សាវិចារណញ្ញាណ និងខិតខំប្រឹងប្រែងជាមួយគ្នា ដើម្បីរក្សាទំនាក់ទំនងផ្នែកសេដ្ឋកិច្ចនិងពាណិជ្ជកម្មរវាងប្រទេសចិននិងអាមេរិកឲ្យមានសភាពនឹងនរជាទូទៅ ។ ភាគីទាំងពីរឯកភាពគ្នាថានឹងរក្សាការប្រាស្រ័យទាក់ទងអំពីរឿងនេះជាបន្តទៀត ។