ថ្ងៃទី ២៣ ខែមីនា ពេលផ្តល់បទសម្ភាសន៍ជាមួយស្ថានីយទូរទស្សន៍អាមេរិក លោកCui Tiankai ឯកអគ្គរដ្ឋទូតចិនប្រចាំអាមេរិកបានថ្លែងថា ទាក់ទិននឹងរឿងដែលសហរដ្ឋអាមេរិកប្រកាសពីលទ្ធផលនៃការត្រួតពិនិត្យលេខ ៣០១ និងចាត់វិធានការដាក់កំហិតចំពោះការនាំចូលនិងសហគ្រាសរបស់ប្រទេសចិន ប្រទេសចិនកំពុងគិតពិចារណាពីគ្រប់ជម្រើសទាំងអស់ដើម្បីគាំពារសិទ្ធិនិងផលប្រយោជន៍ស្របច្បាប់របស់ខ្លួន ។ ប្រទេសចិនបង្ហាញការប្រឆាំងយ៉ាងច្បាស់លាស់ចំពោះរាល់សកម្មភាពឯកតោភាគីនិងគាំពារពាណិជ្ជកម្មនិយមម្យ៉ាងទៀត ទង្វើទាំងនេះក៏នឹងបង្ខូចផលប្រយោជន៍របស់ភាគីពាក់ព័ន្ធនានា ក៏ដូចជាប្រជាពលរដ្ឋ សហគ្រាស និងទីផ្សារហិរញ្ញវត្ថុរបស់អាមេរិកផងដែរ។
លោក Cui Tiankai បានមានប្រសាសន៍ទៀតថា បច្ចុប្បន្ន ប្រទេសនានាលើពិភពលោកមានទំនាក់ទំនងស្អិតល្មួតលើវិស័យសេដ្ឋកិច្ច បានបង្កើតសហគមន៍រួមវាសនាមួយដែលមានផលប្រយោជន៍ដូចគ្នា ។ ប្រទេសចិនមិនចង់ធ្វើសង្រ្គាមពាណិជ្ជកម្មជាមួយប្រទេសណាមួយនោះទេ ហើយក៏ខិតខំចៀសវាងពីសង្រ្គាមពាណិជ្ជកម្មផងដែរ ។ ប៉ុន្តែប្រសិនបើមានអ្នកណាមានះចង់ធ្វើបែបនេះ នោះយើងនឹងតបតទៅវិញជាដាច់ខាត ។ ប្រទេសចិនមិនឱនក្បាល់ចំពោះការគំរាមកំហែងណាមួយនោះទេ ហើយនឹងចាត់នូវរាល់វិធានការចាំបាច់ដើម្បីគាំពារសិទ្ធិនិងផលប្រយោជន៍ស្របច្បាប់របស់ខ្លួន ។
លោក Cui Tiankai បានថ្លែងទៀតថា កិច្ចសហប្រតិបត្តិការរវាងប្រទេសចិននិងអាមេរិកមានសក្តានុពល និងអនាគតដ៏ល្អប្រសើរ ចំណុចជាគន្លឹះគឺភាគីទាំងពីរត្រូវដោះស្រាយបញ្ហាតាមរយៈកិច្ចសហប្រតិបត្តិការនិងមធ្យោបាយមានភាពស្ថាបនា ហើយរូបភាពបដិបក្ខគ្នាគឺវាគ្មានផលប្រយោជន៍ចំពោះភាគីណាមួយនោះឡើយ ៕