យប់ថ្ងៃទី ៣១ ខែមករា លោក លី ខឺឈាង នាយករដ្ឋមន្ត្រីចិនបានរួមជាមួយលោកស្រី Theresa May នាយករដ្ឋមន្ត្រីអង់គ្លេស ដែលអញ្ជើញមកបំពេញទស្សនកិច្ចនៅប្រទេសចិន បានជួបសន្ទនាជាមួយតំណាងសហគ្រិនដែលបានចូលរួមមហាសន្និបាតបង្កើតគណៈកម្មាធិការសហគ្រិនចិន-អង់គ្លេសនិងកិច្ចប្រជុំលើកទីមួយនៃស្ថាប័ននេះ។
ថ្នាក់ដឹកនាំទាំងពីររូបបានស្តាប់សេចក្តីរាយការណ៍ពីតំណាងសហគ្រិនប្រទេសទាំងពីរចិននិងអង់គ្លេស។ លោក លី ខឺឈាង បានថ្លែងថា កិច្ចសហប្រតិបត្តិការសេដ្ឋកិច្ចនិងពាណិជ្ជកម្មរវាងចិននិងអង់គ្លេសបានចូលក្នុង "ផ្លូវល្បឿនលឿន" កំណើននៃការវិនិយោគគ្នាទៅវិញទៅមកបានបន្តពង្រីកថែមមួយកម្រិតទៀត ហើយពាណិជ្ជកម្មទ្វេភាគីក៏កំពុងវិវឌ្ឍទៅកាន់ទិសដៅកាន់តែល្អរលូននិងមានតុល្យភាពផងដែរ។