កាលពីថ្ងៃទី ១៨ ខែមករា អ្នកនាំពាក្យវិទ្យាស្ថានស្រាវជ្រាវកិច្ចការអាមេរិកនៃក្រសួងការបរទេសកូរ៉េខាងជើងបានថ្កោលទោសអាមេរិកដែលផ្តើមគំនិតបើកធ្វើសន្និសីទថ្នាក់រដ្ឋមន្ត្រីការបរទេសពហុភាគីអំពីបញ្ហាកូរ៉េខាងជើងនៅក្រុងVancouver កាណាដានាពេលថ្មីៗកន្លងទៅនេះ ដោយបញ្ជាក់ថា ក្នុងខណៈពេលដែលសកលលោកទាំងមូលបានសំដែងការអបអរស្វាគមន៍ចំពោះការកែលម្អនៃទំនាក់ទំនងរវាងកូរ៉េខាងជើងនិងខាងត្បូងនិងការបន្ធូរបន្ថយភាពតានតឹងនៅឧបទ្វីបកូរ៉េ អាមេរិកបែរជាកោះហៅប្រទេសដែលបានចូលរួមសង្រ្គាមឈ្លានពានកូរ៉េខាងជើងទៅជួបជុំគ្នាដើម្បីធ្វើការពិគ្រោះពីបញ្ហាបង្កើនការដាក់កម្លាំងសម្ពាធទៅលើកូរ៉េខាងជើងទៅវិញ ក្នុងបំណងចង់បង្កសង្គ្រាមថ្មីទៅលើឧបទ្វីបកូរ៉េដោយចំហ ។ ឆ្លងតាមរយៈសន្និសីទលើកនេះអាចបង្ហាញថា ទោះបីជាអាមេរិកនិយាយថាមានបំណងធ្វើកិច្ចសន្ទនាក្តី តែតាមពិតគឺចង់បង្កសង្រ្គាមនៅឧបទ្វីបកូរ៉េទៅវិញ ។