កិច្ចប្រជុំថ្នាក់ដឹកនាំនៃកិច្ចសហប្រតិបតិ្តការឡានឆាង-មេគង្គលើកទីពីរបានធ្វើឡើងដោយជោគជ័យនៅក្រុងភ្នំពេញរាជធានីប្រទេសកម្ពុជាកាលពីថ្ងៃទី១០ខែមករាកន្លងទៅនេះ។ក្នុងពេលផ្តល់បទសម្ភាសន៍ពិសេសដល់អ្នកសារព័ត៌មានវិទ្យុអន្តរជាតិចិនកាលពីថ្ងៃទី១៥ខែមករា លោក HuangLianXiដែលជិតនឹងទៅបំពេញតួនាទីជាឯកអគ្គរដ្ឋទូតចិនប្រចាំនៅអាស៊ានបានថ្លែងថា កិច្ចប្រជុំលើកនេះបានទទួលផលផ្លែផ្កាជាច្រើននិងមានឥទ្ធិពលយូរអង្វែង កិច្ចប្រជុំនេះមានសញ្ញាបង្ហាញថា កិច្ចសហប្រតិបតិ្តការឡានឆាង-មេគង្គបានឈានពីដំណាក់កាលថែរក្សានិងពូនជ្រំទៅដល់ដំណាក់កាលលូតលាស់ដោយរលូន។
អំឡុងកិច្ចប្រជុំថ្នាក់ដឹកនាំនៃកិច្ចសហប្រតិបតិ្តការឡានឆាង-មេគង្គលើកទីពីរ លោកLiKeQiangនាយករដ្ឋមន្រ្តីចិនបានលើកឡើងនូវក្របខ័ណ្ឌកិច្ចសហប្រតិបត្តិការ៣បូក៥បូកX គឺប្រកាន់ខ្ជាប់នូវសសរស្តម្ភអភិវឌ្ឍន៍ចំនួន៣ដែលមានភាពស៊ីសង្វាក់គ្នាគឺសន្តិសុខផ្នែកនយោបាយ សេដ្ឋកិច្ចនិងការអភិវឌ្ឍន៍ដោយចីរភាពនិងមនុស្សសាស្រ្តនិងវប្បធម៌សង្គម ធ្វើកិច្ចសហប្រតិបត្តិការជាអទិភាពលើវិស័យការតភ្ជាប់ សមត្ថភាពផលិត សេដ្ឋកិច្ចឆ្លងដែន ធនធានទឹក កសិកម្មនិងការកាត់បន្ថយភាពក្រីក្រ បន្តពង្រីកការអភិវឌ្ឍក្នុងវិស័យសេដ្ឋកិច្ចdigital ការការពារបរិស្ថាន អនាម័យ គយនិងយុវជនជាដើម។