ថ្ងៃទី២៣ខែឧសភាឆ្នាំ២០១៧ ក្រុង Marawiដែលស្ថិតនៅភាគខាងត្បូងនៃប្រទេសហ្វីលីពីនបានរងការវាយប្រហារដោយភេរវកម្ម អង្គការMauteជាកងកម្លាំងប្រដាប់អាវុធប្រឆាំងរដ្ឋាភិបាលបានបាញ់ប្រយុទ្ធគ្នាយ៉ាងក្តៅគគុកជាមួយកងទ័ពរដ្ឋាភិបាលហ្វីលីពីន ព្រមទាំងបានទន្រ្ទានកាន់កាប់ក្រុង Marawiទៀតផង។ថ្ងៃទី២៥ខែឧសភា លោកDuterteប្រធានាធិបតីហ្វីលីពីនបានប្រកាសអនុវត្តច្បាប់អាជ្ញាសឹកនៅក្រុង Marawi។ក្នុងរបាយការណ៍ជាលាយលក្ខណ៍អក្សរដែលដាក់ជូនរដ្ឋសភា លោកDuterteបានថ្លែងថា អង្គការMauteនិងកងកម្លាំងប្រដាប់អាវុធAbu Sayyafប៉ុនប៉ងរួមគ្នាបង្កើតរដ្ឋអំណាចឯករាជ្យ សំដៅគ្រប់គ្រងកោះMindanaoទាំងមូល។សង្រ្គាមនៅក្នុងMarawiដែលបានអូសបន្លាយអស់រយៈពេល៥ខែបានបណ្តាលឲ្យមនុស្សរាប់ពាន់នាក់ស្លាប់បាត់បង់ជីវិត ក្នុងនោះបូករួមទាំងពួកប្រដាប់អាវុធចំនួន៩៦១នាក់ផងដែរ ចំណែកជនស៊ីវិលជាង៤៦ម៉ឺននាក់នៅក្រុងMarawiនិងតំបន់ជុំវិញបានភៀសខ្លួនចេញពីស្រុកកំណើត។រហូតដល់ថ្ងៃទី១៧ខែតុលា លោកDuterteបានប្រកាសជាផ្លូវការថា ក្រុងMarawiបានរំដោះចេញពីកណ្តាប់ដៃរបស់ភេរវជនហើយ។នៅថ្ងៃទី២៦ខែតុលា រដ្ឋមន្រ្តីការពារជាតិហ្វីលីពីនបានប្រកាសថា យុទ្ធនាការប្រឆាំងភេរវកម្មនៅក្រុង Marawiបានបញ្ចប់ជាផ្លូវការ។លោកបានថ្លែងថា រដ្ឋាភិបាលហ្វីលីពីនបានកម្ទេចចោលដោយជោគជ័យនូវការប៉ុនប៉ងធ្វើឲ្យមានការរីករាលដាលដ៏ធ្ងន់ធ្ងរជាងគេមួយលើកនូវទង្វើជ្រុលនិយមនិងកម្លាំងហិង្សានៅក្នុងប្រទេសហ្វីលីពីននិងតំបន់អាស៊ីអាគ្នេយ៍ លោកបានថ្លែងអំណរគុណដល់ប្រទេសចិន ឥណ្ឌូនេស៊ី ម៉ាឡេស៊ីប្រ៊ុយណេនិងសិង្ហបុរីជាដើមដែលបានផ្តល់ការគាំទ្ររហូតអាចឈានដល់ការទទួលបានជោគជ័យក្នុងយុទ្ធនាការMarawiមួយនេះ៕