ថ្ងៃទី ១៦ ខែវិច្ឆិកា ឆ្នាំ ២០១៧ តុលាការកំពូលនៃប្រទេសកម្ពុជាបានប្រកាសសាលក្រមឲ្យរំលាយគណបក្សសង្គ្រោះជាតិនិងហាមសមាជិកគណបក្សសង្គ្រោះជាតិចំនួន ១១៨ រូប មិនឲ្យចូលប្រឡូកក្នុងឆាកនយោបាយរយៈពេល ៥ ឆ្នាំ។ ក្រសួងមហាផ្ទៃកម្ពុជាបានឲ្យដឹងថា គណបក្សសង្គ្រោះជាតិបានលួចឃុបឃិតជាមួយកម្លាំងបរទេស ក្នុងបំណងផ្តួលរំលំរដ្ឋាភិបាលស្របច្បាប់នៅកម្ពុជា ក្រោមទម្រង់នៃបដិវត្តន៍ពណ៌។ កាលពីពេលមុននេះ គឺនៅថ្ងៃទី ៣ ខែកញ្ញា លោក កឹម សុខា ប្រធានគណបក្សសង្គ្រោះជាតិបានត្រូវចាប់ខ្លួនពីបទក្បត់ជាតិ។ ថ្ងៃទី ៦ ខែតុលា រដ្ឋាភិបាលកម្ពុជាបានដាក់ពាក្យបណ្តឹងទៅតុលាការកំពូល ដើម្បីស្នើសុំឲ្យរំលាយគណបក្សសង្គ្រោះជាតិ។ ថ្ងៃទី ១៣ ខែធ្នូ ទាក់ទិននឹងរឿងដែលសហភាពអឺរ៉ុបប្រកាសថានឹងផ្អាកជំនួយសម្រាប់ការបោះឆ្នោតសកលឆ្នាំ ២០១៨ ដល់រាជរដ្ឋាភិបាលកម្ពុជា សម្តេច ហ៊ុន សែន នាយករដ្ឋមន្ត្រីកម្ពុជាបានថ្លែងថា ការបោះឆ្នោតសកលឆ្នាំក្រោយនឹងឡើងតាមពេលកំណត់ ហើយនឹងមានគណបក្សជាច្រើនចូលរួម។ សូមបញ្ជាក់ថា រដ្ឋសភាកម្ពុជាមានអាសនៈចំនួន ១២៣ អាសនៈ។ ការបោះឆ្នោតសកលឆ្នាំ ២០១៣ គណបក្សប្រជាជនកម្ពុជាជាបក្សកាន់អំណាចបាន ៦៨ អាសនៈ រីឯគណបក្សសង្គ្រោះជាតិបាន ៥៥ អាសនៈ៕
