ថ្ងៃទី ១៥ ខែធ្នូ ពេលផ្តល់បទសម្ភាសន៍ជាពិសេសជាមួយអ្នកសារព័ត៌មាននៅក្រុងហាណូយ លោក Hoang Quoc Dung សមាជិកនៃគណៈកម្មាធិការប្រតិបតិ្តរបស់សមាគមន៍ការពារធម្មជាតិនិងបរិស្ថានប្រទេសវៀតណាមបានថ្លែងថា គ្រាន់តែរយៈពេលជាងមួយឆ្នាំប៉ុណ្ណោះ កិច្ចសហប្រតិបតិ្តការឡានឆាង-មេគង្គក៏ទទួលបានសមិទ្ធផលដ៏សំខាន់ គឺដោយសារប្រទេសចិនបានដើរតួនាទីវិជ្ជមានក្នុងដំណើរការនេះ ។
លោក Hoang Quoc Dung បានថ្លែងទៀតថា ក្នុងសនិ្នសីទថ្នាក់ដឹកនាំលើកដំបូងនៃសហប្រតិបតិ្តការឡានឆាង-មេគង្គកាលពីខែមីនាឆ្នាំទៅមិញ បានកំណត់កម្មវិធីបានផលមុនគេចំនួន ៤៥ បច្ចុប្បន្ននេះកម្មវិធីភាគច្រើនបានសម្រេចឬមួយក៏ទទួលបានការវិវឌ្ឍរីកចម្រើនជាក់ស្តែង នេះគឺជាសមិទ្ធផលសំខាន់របស់យន្តការសហប្រតិបតិ្តការឡានឆាង-មេគង្គតាំងពីបានបង្កើតឡើងរៀងមក ។
លោក Hoang Quoc Dung បានគូសបញ្ជាក់ថា យន្តការកិច្ចជំនួបច្រើនថ្នាក់ ក្នុងនោះរួមមានសនិ្នសីទថ្នាក់ដឹកនាំនៃកិច្ចសហប្រតិបតិ្តការឡានឆាង-មេគង្គ និងសនិ្នសីទរដ្ឋមន្ត្រីការបរទេសជាដើម បានផ្តល់វេទិកាសំខាន់មួយសម្រាប់ឲ្យប្រទេសពាក់ព័ន្ធយល់ដឹងគ្នា និងជួយគ្នាទៅវិញទៅមកដោយសមភាព បណ្តាប្រទេសអាចផ្លាស់ប្តូរមតិយោបល់ដោយចំហនិងស្មោះត្រង់អំពីបញ្ហាយកចិត្តទុកដាក់ដូចគ្នា ដូចជាប្រភពទឹកជាដើម ដើម្បីបង្កើនការយល់ដឹងគ្នានិងកិច្ចសហប្រតិបតិ្តការ ៕
