ថ្ងៃទី ១៧ ខែវិច្ឆិកា នៅវិមានសភាប្រជាជនចិន លោកស៊ី ជីនភីង ប្រធានរដ្ឋចិនបានជួបពិភាក្សាការងារជាមួយលោកVarela ប្រធានាធិបតីប៉ាណាម៉ាដែលអញ្ជើញទៅបំពេញទស្សនកិច្ចផ្លូវរដ្ឋនៅប្រទេសចិន ។
ថ្លែងក្នុងកិច្ចជំនួប លោកស៊ី ជីនភីងបានលើកឡើងថា លោកប្រធានាធិបតីvarelaជាប្រធានាធិបតីរូបទីមួយរបស់ប៉ាណាម៉ាដែលមកបំពេញទស្សនកិច្ចនៅប្រទេសចិន ហើយក៏ជាប្រមុខរដ្ឋរូបទី ១ នៃប្រទេសអាមេរិកឡាទីនដែលមកបំពេញទស្សនកិច្ចនៅប្រទេសចិនបន្ទាប់ពីសមាជបក្សកុម្មុយនិស្តចិនលើកទី ១៩ ផងដែរ។ លោកតាងនាមឲ្យប្រជាជនចិនសូមសម្តែងការស្វាគមន៍យ៉ាងរាក់ទាក់កក់ក្តៅចំពោះលោកVarela ហើយសូមកោតសរសើរខ្ពស់ចំពោះលោក Varelaដែលសម្រេចចិត្តបង្កើតចំណងការទូតជាមួយប្រទេសចិន និងមកបំពេញទស្សនកិច្ចនៅប្រទេសចិន ។ ប្រទេសចិនរីករាយរួមសហការយ៉ាងស្អិតល្មួតជាមួយប្រទេសប៉ាណាម៉ាទាំងលើកិច្ចការអន្តរជាតិនិងក្នុងតំបន់ ហើយផ្តល់ការគាំទ្រដល់ប្រទេសប៉ាណាម៉ាក្នុងការបន្តផ្សព្វផ្សាយឥទ្ធិពលវិជ្ជមានក្នុងដំណើរសហប្រតិបត្តិការរវាងប្រទេសចិននិងអាមេរិកឡាទីន ដើម្បីរួមចំណែកជាតម្រិះប្រាជ្ញានិងកម្លាំងដល់សន្តិភាពនិងការអភិវឌ្ឍរបស់ពិភពលោក ។
ជាការឆ្លើយតប លោកVarela បានរំលឹកម្តងទៀតថា ប្រទេសប៉ាណាម៉ាប្រកាន់ខ្ជាប់យ៉ាងដាច់ខាតនូវគោលការណ៍ប្រទេសចិនតែមួយ និងគាំទ្រយ៉ាងមុតមាំដល់ប្រទេសចិនក្នុងការបង្រួបបង្រួមជាតិដោយសន្តិវិធី ៕