ថ្ងៃទី ១៦ ខែវិច្ឆិកា ឆ្នាំ ២០១៧ គណៈប្រតិភូមន្រ្តីការទូតបរទេសប្រចាំនៅប្រទេសចិនបានអញ្ជើញទៅទស្សនានៅក្រុងស៊ីងហ្វា ជាទីក្រុងល្បីឈ្មោះផ្នែកប្រវត្តិសាស្រ្តនិងវប្បធម៌នៃខេត្តជាំងស៊ូ ប្រទេសចិន ។ គណៈប្រតិភូមន្រ្តីការទូតបរទេសបានទៅទទួលអារម្មណ៍ពីការអភិវឌ្ឍយ៉ាងលឿននៃធុរកិច្ចអេឡិចត្រូនិចលើវិស័យកសិករ កសិកម្មនិងជនបទ ព្រមនិងសមិទ្ធផលនៃកិច្ចកសាងអេកូ-បរិស្ថាន ព្រមនិងចូលរួមទស្សនាការសម្តែងសិល្បៈវប្បធម៌ប្រពៃណីចិនរបស់សិស្សានុសិស្សចិនទៀតផង។
ក្រោយពីបញ្ចប់ការទស្សនានៅសួនឧស្សាហកម្មធុរកិច្ចអេឡិចត្រូនិចក្រុងស៊ីងហ្វា គណៈប្រតិភូមន្រ្តីការទូតបរទេសបានអញ្ជើញទៅដល់វិទ្យាល័យសាវយ៉ាងហ៊ូ និងទស្សនាការសម្តែងសិល្បៈដ៏ល្អឆើត។ ពេលផ្តល់បទសម្ភាសន៍ជាមួយអ្នកសារព័ត៌មាន លោកនី កែវប៉ុញ្ញា លេខាធិការទីមួយនៃស្ថានទូតព្រះរាជាណាចក្រកម្ពុជាប្រចាំនៅប្រទេសចិនបានមានប្រសាសន៍ថា ការសម្តែងសិល្បៈលើកនេះពិតជាអស្ចារ្យមែន កម្មវិធីនីមួយៗសុទ្ធតែគួរឲ្យចង់ទស្សនា ដូចជាការសម្តែងរាំនាគ លោកធ្លាប់តែទស្សនានៅក្នុងរោងភាពយន្តឬតាមកញ្ចក់ទូរទស្សន៍ប៉ុណ្ណោះទេ ក្នុងដំណើរទស្សនកិច្ចលើកនេះអាចទស្សនាផ្ទាល់នឹងភ្នែកនៅនឹងកន្លែង ពិតជារំភើបចិត្តណាស់ ។
លោកនី កែវប៉ុញ្ញាបានថ្លែងថា កម្មវិធីសម្តែងដែលលោកចូលចិត្តបំផុតគឺកម្មវិធីប្រើដៃទទេទៅលំពែង ដែលជាក្បាច់គុនកុងហ្វូចិនម្យ៉ាង ។ លោកថ្លែងថា លោកធ្លាប់ទស្សនាភាពយន្តចិនដែលក្នុងនោះមានបញ្ចូលក្បាច់គុនកុងហ្វូជាច្រើន ភាពយន្តទាំងនេះបានធ្វើឲ្យទស្សនិកជនអាចទទួលអារម្មណ៍ពីកម្លាំងទាក់ទាញដ៏អាថ៌កំបាំងមួយពីក្បាច់គុនកុងហ្វូចិន ។ ហេតុដូច្នេះ ភាពយន្តក្បាច់គុនកុងហ្វូចិនគឺពេញនិយមណាស់លើពិភពលោក ក៏ដូចជាក្នុងប្រទេសកម្ពុជាផងដែរ ។
ទោះបីជាការទៅទស្សនានៅក្រុងថៃចូវមានរយៈពេលតែ ៣ ថ្ងៃប៉ុណ្ណោះ ប៉ុន្តែបានបន្សល់នូវចំណាប់អារម្មណ៍យ៉ាងជ្រាលជ្រៅសម្រាប់លោកនី កែវប៉ុញ្ញា ។ លោកថ្លែងថាលោកមានទឹកចិត្តសោមនស្សរីករាយណាស់ដែលមានឱកាសមកទស្សនាក្រុងថៃចូវ ។ ប្រជាជនក្នុងតំបន់នេះសុទ្ធតែមានភាពរាក់ទាក់និងរាប់អានជាមួយយើងដោយស្នាមញញឹមដ៏ស្មោះត្រង់ ។ ប្រទេសចិននិងកម្ពុជាជាប្រទេសជិតខាងដែលមានវប្បធម៌ស្រដៀងគ្នា ។ ដំណើរទស្សនកិច្ចលើកនេះបានជំរុញឲ្យយើងមានការយល់ដឹងពីគ្នាកាន់តែច្រើន និងធ្វើឲ្យមិត្តភាពរវាងប្រទេសទាំងពីរកម្ពុជានិងចិនមានភាពកាន់តែស៊ីជម្រៅ ៕
