មុនពេលធ្វើដំណើរមកដល់ក្រុងស៊ីអាន ខ្ញុំបានស្វែងយល់ពីទីក្រុងមួយនេះ តាមរយៈឯកសារនិងភាពយន្តនានា ក្នុងនោះ ផ្នូររូបស្មូនទាហាននិងសេះ ផ្លូវស្តេចឈីន និងកំពែងក្រុងបុរាណជាដើមសុទ្ធតែជាកន្លែងល្បីឈ្មោះនៅក្រុងស៊ីអាន ជាពិសេសគឺផ្នូររូបស្មូនទាហាននិងសេះអាចនិយាយបានថាជានាមប័ណ្ណរបស់ក្រុងស៊ីអាន ។ ដូច្នេះក្រុងស៊ីអានគឺជាកន្លែងមួយដែលខ្ញុំប៉ងទៅកម្សាន្តជាយូរមកហើយ ប៉ុន្តែដោយសារជាប់រវល់នឹងការងារផ្សេងៗក៏មិនបានសម្រេចក្តីបំណងទេ ទើបតែពេលដែលវិទ្យុអន្តរជាតិចិនរៀបចំសកម្មភាពអ្នកសារព័ត៌មានចិននិងបរទេសទៅយកបទសម្ភាសន៍នៅក្រុងស៊ីអានទើបខ្ញុំមានឱកាសសម្រេចនូវក្តីបំណងរបស់ខ្លួន។
ក្នុងការមកយកបទសម្ភាសន៍នៅក្នុងក្រុងស៊ីអាន ក្រុមអ្នកសារព័ត៌មានយើង បានទៅដល់កន្លែងមួយដែលមានឈ្មោះថា ឆានប៉ា ដែលជាតំបន់អភិរក្សនិងការពារប្រព័ន្ធអេកូ-បរិស្ថានបានល្អបំផុតនៅក្រុងស៊ីអាន។ កាលពី១៣ឆ្នាំមុន តំបន់ឆាន ប៉ាគឺជាគំនរសំរាមដែលមានបរិស្ថានធម្មជាតិដ៏អាក្រក់គ្មានមនុស្សអាចរស់នៅបាន។ប៉ុន្តែ ឆ្លងតាមរយៈការខិតខំប្រឹងប្រែងការលម្អបរិស្ថានរបស់អាជ្ញាធរដែនដី បច្ចុប្បន្ន តំបន់ឆានប៉ាបានក្លាយជាតំបន់ទេសភាពធម្មជាតិដែលស្រស់ស្អាតបំផុត នៅក្រុងស៊ីអាន ដែលមានឧទ្យានដីសើមធម្មជាតិជាច្រើនកន្លែង ជាពិសេសបន្ទាប់ពី បានរៀបចំពិព័រណ៍សាកវប្បកម្មពិភពលោក បានញ៉ាំងឲ្យតំបន់ឆានប៉ាមានឈ្មោះ បោះសំឡេងដោយសារការប្រែប្រួលមុខមាត់ពីគំនរសំរាមទៅជាឧទ្យានធម្មជាតិដ៏ ស្រស់ប្រិមប្រិយមិនគួរឲ្យជឿ ។ ទេសភាពនៅឆានប៉ាដែលអាចប្រដូចបានទៅនឹង តំបន់ដីសើមស៊ីស៊ីនៅក្រុងហាវចូវ នឹងក្លាយទៅជានាមប័ណ្ណថ្មីមួយទៀតរបស់ក្រុង ស៊ីអានជាក់ជាមិនខាន ។ ពិសេសជាងនេះទៅទៀត បច្ចុប្បន្ននៅក្នុងតំបន់ឆានប៉ា បានសាងសង់នូវក្រុមសំណង់ដ៏ល្អប្រណីតដែលបំពាក់ដោយបរិក្ខារដ៏ជឿនលឿន សម្រាប់បម្រើការដល់ស្ថានកុងស៊ុលបរទេសដែលប្រចាំនៅក្នុងស៊ីអាន នេះគឺជាការ ជំរុញកិច្ចសហប្រតិបត្តិការលើគ្រប់វិស័យរវាងក្រុងស៊ីអានជាមួយបណ្តាប្រទេសនានា ពិសេសគឺផ្នែកវប្បធម៌មនុស្សជាតិ ។ ហើយមន្ត្រីការទូតនៃបណ្តាប្រទេសមុខជា នឹងចូលចិត្តនូវបរិយាកាសការងារនិងជីវភាពរស់នៅក្នុងតំបន់ឆានប៉ានេះពុំខាន ។
ពេលដែលយើងទៅដល់កន្លែងថ្មីមួយ ការភ្លក់ចំណីអាហារពិសេសក្នុងតំបន់គឺ ជារឿងមិនអាចខ្វះបាន ។ នៅក្រុងស៊ីអាន វិថីជនជាតិហួយដែលប្រមូលផ្តុំទៅដោយ ចំណីអាហារឈ្ងុយឆ្ងាញ់គ្រប់ប្រភេទអាចនិយាយបានថាជាឋានសួគ៌របស់អ្នកដែលចូលចិត្តអាហារឆ្ងាញ់ ។ នៅលើវិថីនេះ មិនគ្រាន់តែមានចំណីអាហារឆ្ងាញ់ប្រចាំ តំបន់ប៉ុណ្ណោះទេ ប៉ុន្តែថែមទាំងមានអាហារនិងផ្លែឈើជាច្រើនប្រភេទរបស់ប្រទេស ជាច្រើនផងដែរ ដែលមិនគ្រាន់តែអាចបំពេញនូវតម្រូវការនៃជិវ្ហវិញ្ញាណរបស់យើង ប៉ុណ្ណោះទេ ប៉ុន្តែក៏អាចឲ្យយើងចាប់អារម្មណ៍ពីការប្រកបដោយបរិយាប័ន្ននៃចំណី អាហារផងដែរ ។
កំពែងក្រុងបុរាណក្រុងស៊ីអានដែលមានអាយុកាលជាង៦០០ឆ្នាំហើយនោះ គឺជាក្លោងទ្វារព្រះបរមរាជវាំងរបស់ព្រះរាជវង្សចំនួន១៣រជ្ជកាលនៃប្រទេសចិន ។ ក្នុងរជ្ជកាលថាំងដែលជារជ្ជកាលដ៏រុងរឿងនិងឧដុង្គឧត្តមបំផុតគឺជាមជ្ឈមណ្ឌលសេដ្ឋកិច្ចដ៏ល្បីឈ្មោះនៃពិភពលោក ដែលមានប្រេសិតនៃនគរជាច្រើនបាននាំយក សួយសាអាករមកថ្វាយស្តេចថាំង ។ ពេលដែលប្រេសិតទាំងនេះមកដល់ក្រុងឆាង អាន(ក្រុងស៊ីអានបច្ចុប្បន្ន) នឹងត្រូវចូលទៅគាល់ស្តេចថាំងតាមកំពែងក្រុងនេះ ។ ពេលធ្វើដំណើរតាមកំពែងក្រុង យើងអាចគិតស្រមៃពីទិដ្ឋភាពដ៏អធិកអធមនា សម័យនោះ ដែលធ្វើឲ្យខ្លួនយើងមានអារម្មណ៍ថាហាក់បីដូចជាប្រសិតបរទេស ដែលបានចូលគាល់ស្តេចចិនដូច្នោះ ។
ពេលដែលយើងដើរចូលក្រុងស៊ីអានដែលជាក្រុងបុរាណនិងជារាជធានីនៃរជ្ជកាលចំនួន១៣របស់ ប្រទេសចិន សំបូរទៅដោយវប្បធម៌ប្រវត្តិសាស្ត្រ និងមាន ចំណីអាហារដ៏ឈ្ងុយឆ្ងាញ់ មានរមណីយដ្ឋានប្រវត្តិសាស្ត្រដ៏ល្បីឈ្មោះ នឹង ស្រលាញ់ចូលចិត្តទីក្រុងមួយនេះជាមិនខាន ៕