ពីថ្ងៃទី ១០ ដល់ថ្ងៃទី ១៤ ខែវិច្ឆិកា លោកស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិននិងជាប្រធានរដ្ឋចិនបានអញ្ជើញទៅចូលរួមសន្និសីទក្រៅផ្លូវការស្តីពីថ្នាក់ដឹកនាំនៃអង្គការសហប្រតិបត្តិការសេដ្ឋកិច្ចអាស៊ីប៉ាស៊ីហ្វីកលើកទី ២៥ នៅក្រុងDaNang ប្រទេសវៀតណាមនិងបំពេញទស្សនកិច្ចផ្លូវរដ្ឋនៅប្រទេសវៀតណាមនិងឡាវ ។ បន្ទាប់ពីបញ្ចប់ដំណើរទស្សនកិច្ចប្រកបដោយផ្លែផ្កា លោកWang Yiរដ្ឋមន្រ្តីក្រសួងការបរទេសចិនបានឧទ្ទេសនាមអំពីសមិទ្ធផលនៃដំណើរទស្សនកិច្ចរបស់លោកស៊ី ជីនភីងលើកនេះទៅកាន់អ្នកសារព័ត៌មាន ។
លោកWang Yiបានថ្លែងថា ក្នុងអំឡុងពេល ៥ ថ្ងៃកន្លងទៅនេះ លោកប្រធានរដ្ឋចិនស៊ី ជីនភីងបានអញ្ជើញចូលរួមការរៀបចំសកម្មភាពទ្វេភាគីនិងពហុភាគីជិត ៤០ លើកនិងជួបជាមួយឥស្សរជនគ្រប់មជ្ឈដ្ឋាននៃប្រទេសជាច្រើន ដែលទទួលបានការគាំទ្រយ៉ាងទូលំទូលាយសម្រាប់ការអភិវឌ្ឍនៃប្រទេសចិននាពេលអនាគត ក៏ដូចជាត្រួសត្រាយអនាគតកាន់តែភ្លឺស្វាងនៃកិច្ចសហប្រតិបត្តិការក្នុងតំបន់អាស៊ីប៉ាស៊ីហ្វីក និងបំពេញបន្ថែមកម្លាំងចលករកាន់តែខ្លាំងដល់ទំនាក់ទំនងរវាងចិននិងវៀតណាម ក៏ដូចជារវាងចិននិងឡាវ ។ សាធារណៈមតិជាតិនិងអន្តរជាតិបានសម្គាល់ឃើញថា ដំណើរទស្សនកិច្ចរបស់លោកលើកនេះជាដំណើរទស្សនកិច្ចដ៏សំខាន់សម្រាប់ប្រទេសចិនត្រួសត្រាយស្ថានការណ៍ថ្មីក្នុងកិច្ចការទូត ជាវិធានការដែលប្រកបដោយប្រសិទ្ធភាពសម្រាប់បង្កើតទំនាក់ទំនងអន្តរជាតិបែបថ្មីនិងសហគមន៍រួមវាសនានៃមនុស្សជាតិ ជាការបង្ហាញចេញដ៏អស្ចារ្យនូវទ្រឹស្តីនៃប្រព័ន្ធរបបប្រទេសចិននិងអនាគតអភិវឌ្ឍនៃប្រទេសចិន និងជាការឆ្លុះបញ្ចាំងនូវគតិសង្គមនិយមប្រកបដោយលក្ខណៈពិសេសចិនក្នុងយុគសម័យថ្មីរបស់លោកស៊ី ជីនភីង៕
