ថ្ងៃទី ១៣ ខែវិច្ឆិកា នៅក្រុងវៀងចន្ទន៍ លោកស៊ី ជីនភីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិននិងជាប្រធានរដ្ឋចិនបានជួបពិភាក្សារការងារជាមួយលោក Choummaly Sayyasone អតីតអគ្គលេខាធិការនៃគណៈកម្មាធិការមជ្ឈិមបក្សបដិវត្តន៍ប្រជាជនឡាវនិងជាអតីតប្រធានរដ្ឋឡាវ។
ក្នុងកិច្ចជំនួប លោកស៊ី ជីនភីងបានថ្លែងថា ក្នុងអំឡុងពេល ១០ ឆ្នាំក្នុងមុខតំណែងជាថ្នាក់ដឹកនាំនៃគណបក្សនិងប្រទេសឡាវ លោក Choummaly Sayyasone បានរួមវិភាគទានដ៏សំខាន់ដល់ការជំរុញមិត្តភាពប្រពៃណីរវាងចិននិងឡាវឲ្យមានភាពកាន់តែស៊ីជម្រៅ ។
លោកស៊ី ជីនភីងបានគូសបញ្ជាក់ថា សមិទ្ធផលដ៏សំខាន់នៃសមាជបក្សកុម្មុយនិស្តចិនលើកទី ១៩ គឺមានអំណោយផលដល់កិច្ចកសាងទំនាក់ទំនងអន្តរជាតិបែបថ្មី និងការបង្កើតសហគមន៍រួមវាសនាតែមួយប្រកបដោយអត្ថន័យជាយុទ្ធសាស្រ្តរវាងប្រទេសចិននិងឡាវ ។ ដំណើរទស្សនកិច្ចរបស់លោកលើកនេះ គឺដើម្បីជំរុញទំនាក់ទំនងរវាងចិននិងឡាវឲ្យឈានដល់កម្រិតថ្មីថែមទៀត ។
ជាការឆ្លើយតប លោក Choummaly Sayyasone បានថ្លែងថា ដំណើរទស្សនកិច្ចរបស់លោកស៊ី ជីនភីងលើកនេះគឺប្រកបអត្ថន័យជាប្រវត្តិសាស្រ្តក្នុងប្រវត្តិសាស្រ្តនៃទំនាក់ទំនងរវាងឡាវនិងចិន ៕
