នៅវេលាថ្ងៃត្រង់ថ្ងៃទី១៣ខែវិច្ឆិកា តាមម៉ោងហ្វីលីពីន លោកលីខឺឈាងនាយករដ្ឋមន្រ្តីចិនបានជួបពិភាក្សាជាមួយលោកNguyen Xuan Phucនាយករដ្ឋមន្រ្តីវៀតណាមនៅសណ្ឋាគារដែលលោកបានស្នាក់នៅនៅទីក្រុងម៉ានីល។
ថ្លែងក្នុងកិច្ចជំនួប លោកលីខឺឈាងបានលើកឡើងថា ចិននិងវៀតណាមជាប្រទេសជិតខាងដ៏មេត្រីភាពនិងជាដៃគូដ៏សំខាន់។ភាគីចិនបានចាត់ទុកអាស៊ានជាទិសដៅអាទិភាពសម្រាប់កិច្ចការទូតជាមួយប្រទេសជុំវិញជាប់រហូតមក សង្ឃឹមភាគីនានារួមគ្នាបង្ហាញនូវសញ្ញាវិជ្ជមានស្តីពីការផ្តោតសំខាន់ទៅលើកិច្ចសហប្រតិបត្តិការក្នុងតំបន់និងគាំពារស្ថិរភាពតំបន់ក្នុងសន្និសីទពាក់ព័ន្ធស្តីពីថ្នាក់ដឹកនាំនៃកិច្ចសហប្រតិបត្តិការអាស៊ីបូព៌ាលើកនេះ។ប្រទេសចិនរីករាយក្នុងការរួមសហការជាមួយបណ្តាប្រទេសអាស៊ានដើម្បីជំរុញការពិគ្រោះពិភាក្សានៃក្រមប្រតិបត្តិសមុទ្រចិនខាងត្បូង ដើម្បីឲ្យសមុទ្រចិនខាងត្បូងក្លាយជាសមុទ្រប្រកបដោយសន្តិភាព មិត្តភាពនិងសហប្រតិបត្តិការ។
ជាការឆ្លើយតប លោកNguyen Xuan Phucបានថ្លែងថា ប្រទេសវៀតណាមរីករាយក្នុងការបន្តថែរក្សានិងពូនជ្រំយ៉ាងផ្ចត់ផ្ចង់នូវចំណងមេត្រីភាពរវាងវៀតណាមនិងចិន ធ្វើឲ្យស៊ីជម្រៅនូវទំនាក់ទំនងភាពជាដៃគូសហប្រតិបត្តិការជាយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ក៏ដូចជាជំរុញទំនាក់ទំនងផ្នែកសេដ្ឋកិច្ចនិងពាណិជ្ជកម្មទ្វេភាគីឲ្យឡើងដល់កម្រិតថ្មីមួយទៀត។ប្រទេសវៀតណាមសូមវាយតម្លៃខ្ពស់ចំពោះប្រទេសចិននិងអាស៊ានដែលបានឈានដល់មតិឯកភាពអំពីក្របខ័ណ្ឌនៃក្រមប្រតិបត្តិសមុទ្រចិនខាងត្បូង ហើយរីករាយក្នុងការរួមសហការជាមួយប្រទេសចិន ដើម្បីជំរុញកិច្ចសហប្រតិបត្តិការលើសមុទ្រ និងគាំពារសន្តិភាពនិងស្ថិរភាពនៃសមុទ្រចិនខាងត្បូង៕
