ថៃ្ងទី១០ ខែវិច្ឆិកា លោកស៊ីជីនភីង ប្រធានរដ្ឋចិនបានជួបសន្ទនាការងារជាមួយលោកភូទីន ប្រធានាធិបតីរុសស្ស៊ីនៅក្រុងដាណាងប្រទេសវៀតណាម។
លោកស៊ីជីនភីងបានថែ្លងថា ភាគីចិនរីករាយពួតដៃគ្នាជាមួយភាគីរុស្ស៊ី ជំរុញការអភិវឌ្ឍនៃទំនាក់ទំនងរវាងប្រទេសទាំងពីរដែលមានកម្រិតខ្ពស់ដោយមិនងាយរ៉េដើម្បីជំរុញសន្តិសុខជាតិនិងការអភិវឌ្ឍនៃប្រទេសរៀងៗខ្លួនឲ្យបានកាន់តែល្អប្រសើរនិងជំរុញការធានារក្សាសន្តិភាពនិងស្ថិរភាពនៃតំបន់ព្រមទាំងពិភពលោកឲ្យបានកាន់តែល្អប្រសើរទៀតផង។
លោកស៊ីជីនភីងបានថែ្លងថា អង្គការកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកគឺជាយន្តការកិច្ចសហប្រតិបត្តិការសេដ្ឋកិច្ចសំខាន់បំផុតនៅតំបន់អាស៊ីប៉ាស៊ីហ្វិក។ភាគីចិនរីករាយជាមួយភាគីរុស្ស៊ីបង្កើនការទាក់ទងគ្នានិងកិច្ចសហប្រតិបត្តិការក្នុងក្របខ័ណ្ឌអង្គការកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកដើម្បីជំរុញកិច្ចកសាងនៃតំបន់ពាណិជ្ជកម្មសេរី ការតភ្ជាប់គ្នានិងការទាក់ទងគ្នាទៅវិញទៅមកព្រមទាំងការច្នៃប្រឌិតថ្មីឲ្យទទួលបានការវិវឌ្ឍថ្មីនិងពន្លឿនការកសាងសេដ្ឋកិច្ចបែបបើកចំហ។
លោកភូទីនបានថែ្លងថា ភាគីទាំងពីរត្រូវតែអនុវត្តឲ្យបានល្អតាមមតិដែលបានឯកភាពគ្នារវាងលោកនិងលោកប្រធានរដ្ឋ ស៊ីជីនភីង ធ្វើឲ្យកិច្ចសហប្រតិបត្តិការលើគ្រប់វិស័យកាន់តែស៊ីជម្រៅ រួមមានវិស័យ សេដ្ឋកិច្ចនិងពាណិជ្ជកម្ម ថាមពល កសិកម្មហេដ្ឋារចនាសម័្ពន្ធជាដើម ពង្រីកទំហំការផ្លាស់ប្តូរខាងមនុស្សធម៌និងវប្បធម៌។ភាគីរុស្ស៊ីរីករាយបង្កើនកិច្ចសហប្រតិបត្តិការក្នុងកិច្ចការអន្តរជាតិនិងតំបន់ជាមួយភាគីចិន ធ្វើការទាក់ទងគ្នានិងការសម្របសម្រួលយ៉ាងជិតស្និទ្ធក្នុងអង្គការពហុភាគី ដូចជាអង្គការកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកជាដើម ព្រមទាំងជំរុញកិច្ចកសាងតំបន់ពាណិជ្ជកម្មសេរីអាស៊ីប៉ាស៊ីហ្វិកផងដែរ៕