ថ្ងៃទី ២១ ខែកញ្ញា តាមម៉ោងតំបន់ ក្នុងអំឡុងពេលចូលរួមមហាសន្និបាតនៃអង្គការសហប្រជាជាតិនៅក្រុងញូវយ៉ក លោកវ៉ាង អ៊ី រដ្ឋមន្រ្តីក្រសួងការបរទេសចិនបានជួបពិភាក្សាការងារជាមួយលោកThaung Tun ទីប្រឹក្សារដ្ឋខាងសន្តិសុខនៃប្រទេសមីយ៉ាន់ម៉ា ។ ភាគីទាំងពីរបានធ្វើការផ្លាស់ប្តូរមតិយោបល់ដោយផ្តោតសំខាន់ទៅលើស្ថានការណ៍នៃខេត្តរ៉ាឃាន ។
លោកវ៉ាង អ៊ីបានថ្លែងថា ប្រទេសចិនស្វាគមន៍រដ្ឋាភិបាលមីយ៉ាន់ម៉ាដែលចាត់វិធានការសម្រាប់បន្ធូរភាពតានតឹងនៃស្ថានការណ៍នៅខេត្តរ៉ាឃាន ហើយគាំទ្រដល់ប្រទេសមីយ៉ាន់ម៉ាឲ្យសកម្មស្វែងរកការធ្វើកិច្ចសន្ទនាជាមួយប្រទេសបង់ក្លាដែស ។ ប្រទេសចិនមានក្តីរំពឹងនិងជឿជាក់ថា រដ្ឋាភិបាលមីយ៉ាន់ម៉ាមានសមត្ថភាពធ្វើឲ្យសង្គមមានស្ថិរភាពឡើងវិញ និងឆ្លងតាមរយៈកិច្ចសន្ទនាគ្នាដោះស្រាយបញ្ហាបច្ចុប្បន្ន ៕
