ថ្ងៃទី ២០ ខែកញ្ញា នៅវិមានសភាប្រជាជនចិន លោក ស៊ីជីនភីង ប្រធានរដ្ឋចិនបានជួបសន្ទនាជាមួយលោក Lee Hsien Loong នាយករដ្ឋមន្ត្រីសិង្ហបុរីដែលអញ្ជើញមកបំពេញទស្សនកិច្ចជាផ្លូវការនៅប្រទេសចិន ។
ក្នុងកិច្ចជំនួប លោក ស៊ីជីនភីង បានចង្អុលបង្ហាញថា ការរក្សាការប្រាស្រ័យទាក់ទងថ្នាក់ខ្ពស់គឺជាប្រពៃណីដ៏ល្អប្រសើររបស់ថ្នាក់ដឹកនាំជំនាន់មុនរបស់ប្រទេសទាំងពីរចិននិងសិង្ហបុរី ហើយក៏ជាសញ្ញាបង្ហាញនូវភាពស្អិតល្មួតនៃទំនាក់ទំនងរវាងចិននិងសិង្ហបុរីផងដែរ ។ លោកជឿជាក់ថា ទស្សនកិច្ចរបស់នាយករដ្ឋមន្ត្រីសិង្ហបុរីលើកនេះនឹងធ្វើឲ្យមិត្តភាពជាប្រពៃណីរវាងចិននិងសិង្ហបុរីមានភាពកាន់តែស៊ីជម្រៅ ដើម្បីជំរុញកិច្ចសហប្រតិបតិ្តការលើគ្រប់វិស័យនៃប្រទេសទាំងពីរទទួលបានការអភិវឌ្ឍកាន់តែធំធេង ។
លោក ស៊ីជីនភីង បានគូសបញ្ជាក់ថា កិច្ចកសាងគំនិតផ្តួចផ្តើមខ្សែក្រវាត់មួយនិងផ្លូវមួយគឺជាចំណុចសំខាន់នៃកិច្ចសហប្រតិបតិ្តការរវាងប្រទេសទាំងពីរនាពេលបច្ចុប្បុន្ន លោករំពឹងថាភាគីទាំងពីរអាចកសាងគម្រោងជាគំរូខាងការតភ្ជាប់គ្នាប្រកបដោយយុទ្ធសាស្ត្ររវាងប្រទេសទាំងពីរចិននិងសិង្ហបុរីឲ្យបានល្អ ដើម្បីណែនាំនិងទាក់ទាញឲ្យប្រទេសដទៃទៀតរួមគ្នាចូលរួមកិច្ចកសាងផ្លូវថ្មីនៃពាណិជ្ជកម្មផ្លូវគោកនិងផ្លូវសមុទ្រអន្តរជាតិ ៕
