ថ្ងៃទី ១៦ ខែកញ្ញា តាមម៉ោងតំបន់ លោក Varela ប្រធានាធិបតីនៃប្រទេសប៉ាណាម៉ាបានជួបសំណេះសំណាលជាមួយលោក វ៉ាង អ៊ី រដ្ឋមន្ត្រីការបរទេសចិនដែលអញ្ជើញទៅបំពេញទស្សនកិច្ចនៅប៉ាណាម៉ានៅទីស្តីការប្រធានាធិបតី ។
ក្នុងកិច្ចជំនួប លោក Varela បានថ្លែងថា ប្រទេសប៉ាណាម៉ាបានចងសម្ព័ន្ធផ្លូវទូតជាមួយប្រទេសចិនគឺបានចារទំព័រថី្មសម្រាប់ទំនាក់ទំនងរវាងប្រទេសយើងទាំងពីរ ប្រទេសប៉ាណាម៉ាបានគាំទ្រយ៉ាងសកម្មចំពោះគំនិតផ្តួចផ្តើមខ្សែក្រវាត់មួយនិងផ្លូវមួយដែលលោកប្រធានស៊ីជីនភីងប្រធានរដ្ឋចិនបានលើកឡើង ហើយរីករាយរួមសហការជាមួយប្រទេសចិនដើម្បីរួមវិភាគទានក្នុងការជំរុញការតភ្ជាប់គ្នារបស់ពិភពលោក ។ ប្រទេសប៉ាណាម៉ានឹងប្រកាន់ខ្ជាប់គោលការណ៍មានប្រទេសចិនតែមួយ និងគោរពតាមកិច្ចសន្យាអំពីបញ្ហាតៃវ៉ាន់ មិនធ្វើរាល់ការដែលល្មើសនឹងគោលការណ៍មានប្រទេសចិនតែមួយនិងបង្ខូចដល់ទំនុកចិត្តខាងនយោបាយរវាងភាគីទាំងពីរនោះទេ ។
ជាការឆ្លើយតប លោក វ៉ាងអ៊ីបានថ្លែងថា ការពិតជាក់ស្តែងបានបង្ហាញឲ្យឃើញថា ប្រទេសចិននិងប្រទេសប៉ាណាម៉ាចងសម្ព័ន្ធផ្លូវទូតគឺស្របទាំងស្រុងនឹងផលប្រយោជន៍ជាស្នូលនិងយូរអង្វែងរបស់ប្រទេសនិងប្រជាជនបាណាម៉ា គឺជាជំរើសយុទ្ធសាស្ត្រដ៏ត្រឹមត្រូវមួយ ។ ប្រទេសចិនរីករាយរួមសហការជាមួយប្រទេសប៉ាណាម៉ា ដើម្បីត្រៀមរៀបចំគម្រោងទស្សនកិច្ចរបស់លោកប្រធានាធិបតី Varela នៅប្រទេសចិន ដែលទស្សនកិច្ចលើកនេះនឹងបង្កបង្កើតយុគសម័យថ្មីសម្រាប់កិច្ចសហប្រតិបតិ្តការដែលផ្តល់ផលប្រយោជន៏ឲ្យគ្នាទៅវិញទៅមកនិងភាពរុងរឿងរួមជាមួយគ្នារវាងចិននិងប៉ាណាម៉ាផងដែរ ៕