នាពេលកន្លងទៅថ្មីៗនេះ សន្និសីទស្តីពីយន្តការសន្ទនាថ្នាក់ឧបនាយករដ្ឋមន្ត្រីនិងយន្តការសន្ទនាជាន់ខ្ពស់ផ្នែកសេដ្ឋកិច្ចរវាងចិននិងឥណ្ឌូនេស៊ីបានធ្វើឡើងជាលើកដំបូងនៅប្រទេសចិន ។ នៅថ្ងៃទី ២៣ ខែសីហា ក្នុងសនិ្នសីទសារព័ត៌មានជាប្រចាំ លោកស្រី Hua Chun Ying អ្នកនាំពាក្យក្រសួងការបរទេសចិនបានឧទ្ទេសនាមពីលទ្ធផលនៃសនិ្នសីទពាក់ព័ន្ធ ព្រមទាំងបានថ្លែងថា ប្រការនេះនឹងជំរុញឲ្យទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរទទួលបានការរីកចម្រើនថែមមួយកម្រិតទៀត ។
លោកស្រី Hua Chun Ying បានឧទេ្ទសនាមថា ភាគីទាំងពីរបានឯកភាពគ្នាថា នឹងបន្តរក្សាការប្រាស្រ័យទាក់ទងជាន់ខ្ពស់ និងរក្សាការពិគ្រោះពិភាក្សាគ្នាយ៉ាងជិតស្និទ្ធអំពីបញ្ហាធំនិងសំខាន់ៗដែលពាក់ព័ន្ធដល់ទំនាក់ទំនងរវាងប្រទេសទាំងពីរជាបន្តទៀត ដើម្បីបង្កើនការតភ្ជាប់គ្នារវាងយុទ្ធសាស្ត្រអភិវឌ្ឍន៍និងកិច្ចសហប្រតិបតិ្តការខ្សែក្រវាត់មួយនិងផ្លូវមួយ ។ ភាគីទាំងពីរក៏បានឯកភាពគ្នាផងដែរចំពោះការរួមគ្នាគាំពារសនិ្តភាពនិងសិ្ថរភាពនៅសមុទ្រចិនខាងត្បូងនិងក្នុងតំបន់ ក្នុងន័យជំរុញទំនាក់ទំនងរវាងចិននិងអាស៊ាននិងកិច្ចសហប្រតិបតិ្តការអាស៊ីបូព៌ាឲ្យទទួលបានការអភិវឌ្ឍជាបន្តបន្ទាប់និងកាន់តែមានភាពស៊ីជម្រៅ ក៏ដូចជាបង្កើនការប្រាស្រ័យទាក់ទងនិងសម្របសម្រួលគ្នាទាំងក្នុងយន្តការអន្តរជាតិនិងយន្តការពហុភាគីក្នុងតំបន់ផងដែរ ៕
