តាមការផ្សាយដំណឹងរបស់ទីភ្នាក់ងារសារព័ត៌មានមជ្ឈិមកូរ៉េខាងជើងនៅថ្ងៃទី ១៩ ខែមេសាបានឲ្យដឹងថា ថ្ងៃដដែល ពេលថ្លែងឲ្យដឹងក្នុងសុន្ទរកថា អ្នកនាំពាក្យនៃក្រសួងការពារជាតិកូរ៉េខាងជើងបានថ្លែងថា កូរ៉េខាងជើងកំពុងតាមដានយ៉ាងដិតដល់ចំពោះនិន្នាការនៃឧបាយកលរបស់អាមេរិកដែលសំដៅចំពោះកូរ៉េខាងជើង ។ កងទ័ពកូរ៉េខាងជើងបានត្រៀមលក្ខណៈពេញលេញរួចស្រេចហើយ ប្រសិនបើសហរដ្ឋអាមេរិកចង់ប្រយុទ្ធប្តូរផ្តាច់ជាមួយកូរ៉េខាងជើង នោះកូរ៉េខាងជើងនឹងតបតវិញដល់ទីបញ្ចប់ ។
អ្នកនាំពាក្យរូបនេះបានថ្លែងថា កូរ៉េខាងជើងជាប្រទេសសង្គមនិយមដែលស្រឡាញ់សន្តិភាព តែមិនខ្លាចញញើត ហើយក៏មិនគេចវេះពីសង្រ្គាមដែរ ។ ប្រសិនបើអាមេរិកបំផុសសង្រ្គាម នោះកូរ៉េខាងជើងនឹងធ្វើសង្រ្គាមគ្រប់ជ្រុងជ្រោយដើម្បីតបតទៅវិញដោយប្រើវិធីប្រយុទ្ធនុយគ្លេអ៊ែរបែបកូរ៉េខាងជើងសំដៅតទល់នឹងសង្រ្គាមនុយគ្លេអ៊ែរ ។
ដោយឡែក នៅថ្ងៃទី ២១ ខែមេសា អ្នកនាំពាក្យនៃគណៈកម្មាធិការសន្តិភាពអាស៊ីប៉ាស៊ីហ្វិករបស់ប្រទេសកូរ៉េខាងជើងក៏បានចេញសេចក្តីថ្លែងការណ៍ដែរថា ពាក្យសម្តីគំរាមកំហែងដល់កូរ៉េខាងជើងរបស់លោកMike Penceអនុប្រធានាធិបតីអាមេរិកនិងលោកHwang Kyo-ahn ប្រធានាធិបតីស្តីទីកូរ៉េខាងត្បូងកាលពីពេលថ្មីៗកន្លងទៅ បានបង្ហាញឲ្យឃើញថា ប្រទេសអាមេរិកនិងកូរ៉េខាងត្បូងជាប្រភពនៃការគំរាមកំហែងនិងបំផ្លាញដល់សុខសន្តិភាពនៃឧបទ្វីបកូរ៉េនិងក្នុងតំបន់ ៕