ថ្ងៃទី ២០ ខែមេសា លោកYang Jiechi ទីប្រឹក្សាកិច្ចការរដ្ឋចិនបានជួបពិភាក្សាការងារជាមួយលោកHishammuddin Tun Hussein រដ្ឋមន្រ្តីក្រសួងការពារជាតិនិងជារដ្ឋមន្រ្តីទទួលបន្ទុកកិច្ចការពិសេសនៃទីស្តីការនាយករដ្ឋមន្រ្តីម៉ាឡេស៊ីដែលអញ្ជើញមកបំពេញទស្សនកិច្ចនៅ ឯទីស្តីការរដ្ឋចុងណានហៃ ។
លោក Yang Jiechi បានថ្លែងថា បច្ចុប្បន្ន ការអភិវឌ្ឍទំនាក់ទំនងរវាងប្រទេសចិននិងម៉ាឡេស៊ីមាននិន្នាការល្អប្រសើរ ។ ភាគីទាំងពីរមានការប្រាស្រ័យទាក់ទងគ្នាយ៉ាងស្អិតល្មួត កិច្ចសហប្រតិបត្តិការជាក់ស្តែងមានភាពកាន់តែស៊ីជម្រៅឥតឈប់ឈរ ។ ភាគីទាំងពីររីករាយបង្កើនការតភ្ជាប់គ្នាផ្នែកយុទ្ធសាស្រ្តអភិវឌ្ឍន៍ក្រោមក្របខ័ណ្ឌនៃសេចក្តីផ្តួចផ្តើមស្តីពីកិច្ចសហប្រតិបត្តិការនៃយុទ្ធសាស្រ្ត"ខ្សែក្រវាត់មួយនិងផ្លូវមួយ" ហើយជឿជាក់ថា ក្រោមកិច្ចខិតខំប្រឹងប្រែងរួមរបស់ភាគីទាំងពីរ ទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយរវាងប្រទេសចិននិងម៉ាឡេស៊ីនឹងទទួលបាននូវការវិវឌ្ឍកាន់តែច្រើនថែមទៀត ។
ជាការឆ្លើយតប លោក Hishammuddin Tun Husseinបានថ្លែងថា ភាគីម៉ាឡេស៊ីផ្តោតការយកចិត្តទុកដាក់ខ្ពស់លើការពង្រឹងទំនាក់ទំនងជាមួយប្រទេសចិន សកម្មផ្តល់ការគាំទ្រចំពោះសេចក្តីផ្តួចផ្តើមអំពីយុទ្ធសាស្រ្ត"ខ្សែក្រវាត់មួយនិងផ្លូវមួយ" ហើយរីករាយធ្វើកិច្ចសហការយ៉ាងជិតស្និទ្ធជាមួយភាគីចិន សំដៅធ្វើឲ្យទំនាក់ទំនងមេត្រីភាពរវាងប្រទេសទាំងពីរមានភាពកាន់តែស៊ីជម្រៅឥតឈប់ឈរ ៕
