ថ្ងៃទី ១៩ ខែមេសា កិច្ចសន្ទនាជាយុទ្ធសាស្រ្តជាន់ខ្ពស់រវាងចិននិងអឺរ៉ុបលើកទី ៧ បានប្រារព្ធធ្វើឡើងនៅក្រុងប៉េកាំង ក្រោមអធិបតីភាពលោកយ៉ាង ចេឈី ទីប្រឹក្សាកិច្ចការរដ្ឋចិននិងលោកស្រីFederica Mogherini អនុប្រធានគណៈកម្មាធិការសហភាពអឺរ៉ុបនិងជាតំណាងជាន់ខ្ពស់ផ្នែកការទូតនិងគោលនយោបាយសន្តិសុខនៃសហភាពអឺរ៉ុប ។
លោកយ៉ាង ចេឈីបានថ្លែងថា មតិឯកភាពរួមជាយុទ្ធសាស្រ្តរបស់ថ្នាក់ដឹកនាំចិននិងអឺរ៉ុបស្តីពីការបង្កើតទំនាក់ទំនងភាពជាដៃគូរវាងប្រទេសចិននិងអឺរ៉ុបលើវិស័យធំៗទាំងបួនដូចជាសន្តិភាព កំណើន កំណែទម្រង់ និងអរិយធម៌ គឺប្រកបដោយសារៈប្រយោជន៍ជាក់ស្តែងនិងវែងឆ្ងាយ ។ ការធ្វើឲ្យកិច្ចសហប្រតិបត្តិការរវាងប្រទេសចិននិងអឺរ៉ុបមានភាពកាន់តែស៊ីជម្រៅគឺពាក់ព័ន្ធនឹងផលប្រយោជន៍រួមរបស់ភាគីទាំងពីរ ព្រមទាំងមានសារៈសំខាន់ចំពោះការអភិវឌ្ឍទំនាក់ទំនងផ្នែកនយោបាយនិងសេដ្ឋកិច្ចអន្តរជាតិផងដែរ ។
ជាការឆ្លើយតប លោកស្រីFederica Mogherini បានថ្លែងថា ទំនាក់ទំនងរវាងអឺរ៉ុបនិងចិនមានភាពវិជ្ជមាន ចាស់ទុំ និងប្រកបដោយភាពរស់រវើក ជាកត្តាសំខាន់ក្នុងការជំរុញស្ថិរភាពនិងការអភិវឌ្ឍនៃពិភពលោក ៕
