ថ្ងៃទី២៣ខែមីនា លោកស្រីHua Chunyingអ្នកនាំពាក្យនៃក្រសួងការបរទេសចិនបានថ្ែលងនៅក្រុងប៉េកាំងថា ស្ថានការណ៍សមុទ្រចិនខាងត្បូងក្នុងពេលបច្ចុប្បន្នមាននិន្នាការល្អប្រសើរ ប្រទេសចិនរីករាយរួមសហការជាមួយប្រទេសអាស៊ានក្នុងការធ្វើកិច្ចខិតខំប្រឹងប្រែងដើម្បីសកម្មជំរុញការពិគ្រោះពិភាក្សាអំពីក្រមប្រតិបត្តិសមុទ្រចិនខាងត្បូង។
តាមការផ្សាយដំណឹងឲ្យដឹងថា លោកប្រាយុទ្ធនាយករដ្ឋមន្រ្តីថៃបានធ្វើកិច្ចជំនួបជាមួយលោកឌូតឺទេប្រធានាធិបតីហ្វីលីពីនកាលពីថ្ងៃទី២១ខែមីនា ភាគីទាំង២បានគូសបញ្ជាក់នូវភាពចាំបាច់នៃការអនុវត្តដោយគ្រប់ជ្រុងជ្រោយនិងមានប្រសិទ្ធភាពនូវសេចក្តីប្រកាសប្រតិបត្តិរបស់បណ្តាភាគីសមុទ្រចិនខាងត្បូង ក៏ដូចជាសន្យាថានឹងខិតខំជំរុញការសម្រេចឲ្យបាននូវក្របខ័ណ្ឌនៃក្រមប្រតិបត្តិសមុទ្រចិនខាងត្បូង។ ទាក់ទិននឹងប្រការនេះ លោកស្រីHua Chunyingបានថ្លែងថា ក្រោមកិច្ចខិតខំប្រឹងប្រែងរួមរបស់ប្រទេសចិននិងអាស៊ាន សាមីភាគីពាក់ព័ន្ធជម្លោះបានវិលទៅរកផ្លូវត្រឹមត្រូវវិញ ពោលគឺដោះស្រាយជម្លោះតាមរយៈការចរចានិងការពិគ្រោះពិភាក្សា សេចក្តីប្រកាសប្រតិបត្តិរបស់បណ្តាភាគីសមុទ្រចិនខាងត្បូងបាននិងកំពុងត្រូវបានអនុវត្តដោយគ្រប់ជ្រុងជ្រោយនិងមានប្រសិទ្ធភាព ហើយសេចក្តីព្រាងច្បាប់ទី១អំពីក្របខ័ណ្ឌនៃក្រមប្រតិបត្តិសមុទ្រចិនខាងត្បូងក៏បានចេញជារូបរាងហើយ៕