នៅរសៀលថ្ងៃទី ២៣ ខែមីនាតាមម៉ោងតំបន់អូស្រ្តាលី លោកLi Keqiang នាយករដ្ឋមន្រ្តីចិនបានជួបពិភាក្សាការងារជាមួយលោកPeter Cosgrove អគ្គទេសាភិបាលអូស្ត្រាលីនៅទីស្តីការអគ្គទេសាភិបាលនាក្រុងកង់បេរ៉ា ។
លោកLi Keqiang បានថ្លែងថា មិត្តភាពរវាងចិននិងអូស្រ្តាលីមានភាពកាន់តែស៊ីជម្រៅជាបន្តបន្ទាប់ កិច្ចសហប្រតិបត្តិការលើគ្រប់វិស័យបានវិវឌ្ឍប្រកបដោយចីរភាព ។ ប្រទេសចិនរីករាយក្នុងការគោរពនិងរាប់អានគ្នាប្រកបដោយសមភាពជាមួយប្រទេសអូស្រ្តាលី ក្នុងន័យពង្រីកវិស័យសហប្រតិបត្តិការជាក់ស្តែង បង្កើនការផ្លាស់ប្តូរផ្នែកវប្បធម៌មនុស្សជាតិ ដើម្បីឲ្យទំនាក់ទំនងរវាងប្រទេសទាំងពីរអាចនាំមកនូវសុខសុភមង្គលដល់ប្រជាជននៃប្រទេសទាំងពីរកាន់តែច្រើនថែមទៀត ។
ជាការឆ្លើយតប លោកPeter Cosgroveបានសម្តែងកិច្ចស្វាគមន៍ចំពោះលោកLi Keqiang នាយករដ្ឋមន្រ្តីចិនដែលអញ្ជើញទៅបំពេញទស្សនកិច្ចនៅប្រទេសអូស្រ្តាលី ព្រមនិងថ្លែងថា ប្រទេសអូស្រ្តាលីរីករាយដែលមើលឃើញថា សេដ្ឋកិច្ចចិនរក្សាសន្ទុះកំណើនយ៉ាងខ្លាំង ហើយជឿជាក់ថា ប្រទេសអូស្រ្តាលីនឹងអាចទទួលបានផលប្រយោជន៍ផងដែរ ។ ប្រទេសអូស្រ្តាលីមានបំណងពង្រឹងនិងពង្រីកការប្រាស្រ័យទាក់ទងនិងកិច្ចសហប្រតិបត្តិការគ្រប់ស្រទាប់ជាន់ថ្នាក់និងគ្រប់វិស័យរវាងប្រទេសទាំងពីរ សំដៅជំរុញទំនាក់ទំនងរវាងប្រទេសអូស្រ្តាលីនិងចិនឲ្យរីកចម្រើនឥតឈប់ឈរ ៕
