ថ្ងៃទី២២ខែកុម្ភៈ លោកGengShuangអ្នកនាំពាក្យក្រសួងការបរទេសចិនបានថ្លែងឲ្យដឹងក្នុងសន្និសីទកាសែតជាប្រចាំថា សន្និសីទលើកទី១៩នៃក្រុមការងារអនុវត្តសេចក្តីប្រកាសប្រតិបត្តិនៃបណ្តាភាគីសមុទ្រចិនខាងត្បូងនឹងបើកធ្វើនៅកោះបាលីនៃប្រទេសឥណ្ឌូនេស៊ីនៅថ្ងៃទី២៧ខែកុម្ភៈខាងមុខនេះ ដល់ពេលនោះ បណ្តាភាគីនឹងផ្លាស់ប្តូរមតិគ្នាអំពីការអនុវត្តសេចក្តីប្រកាស ការជំរុញកិច្ចសហប្រតិបត្តិការជាក់ស្តែងលើសមុទ្រនិងធ្វើការពិគ្រោះពិភាក្សាស្តីពីបញ្ហាពាក់ព័ន្ធនឹងក្រមប្រតិបត្តិសមុទ្រចិនខាងត្បូង។
លោកGengShuangបានបង្ហាញថា បច្ចុប្បន្ននេះ នៅក្រោមការខិតខំប្រឹងប្រែងរួមរបស់ប្រទេសចិននិងអាស៊ាន ស្ថានការណ៍នៅសមុទ្រចិនខាងត្បូងមានភាពនឹងនរជាបណ្តើរៗហើយ។ភាគីចិនរីករាយរួមសហការជាមួយអាស៊ាន ខ្នះខ្នែងជំរុញដំណើរវិវឌ្ឍន៍នៃការពិគ្រោះពិភាក្សាអំពីក្រមប្រតិបត្តិសមុទ្រចិនខាងត្បូង លើមូលដ្ឋានអនុវត្តដោយគ្រប់ជ្រុងជ្រោយនូវសេចក្តីប្រកាសប្រតិបត្តិនៃបណ្តាភាគីសមុទ្រចិនខាងត្បូង ព្រមទាំងសម្រេចនូវសេចក្តីព្រាងនៃក្របខ័ណ្ឌក្រមប្រតិបត្តិសមុទ្រចិនខាងត្បូងនៅមុនពាក់កណ្តាលឆ្នាំនេះ ដើម្បីខិតខំសម្រេចឲ្យបានឆាប់រហ័សនូវក្រមប្រតិបត្តិសមុទ្រចិនខាងត្បូងលើមូលដ្ឋាននៃមតិឯកភាពរួម។