ថ្ងៃទី ២៨ ខែវិច្ឆិកា នៅក្រុងប៉េកាំង លោកស៊ី ជីនភីង ប្រធានរដ្ឋចិនបានជួបពិភាក្សាការងារជាមួយលោកAntonio Guterres អគ្គលេខាធិការបម្រុងនៃអង្គការសហប្រជាជាតិ ។
លោកស៊ី ជីនភីងបានជូនពរលោក Guterres ដែលនឹងត្រូវឡើងទទួលមុខតំណែងជាអគ្គលេខាធិការនៃអង្គការសហប្រជាជាតិអាណត្តិក្រោយ ហើយគូសបញ្ជាក់ថា ប្រទេសចិននឹងផ្តល់ការគាំទ្រយ៉ាងមុតមាំចំពោះលោក Guterres ក្នុងការបំពេញតួនាទីជាអគ្គលេខាធិការអង្គការសហប្រជាជាតិឲ្យបានល្អ ។ លោកស៊ី ជីនភីងបានសង្កត់ធ្ងន់ទៀតថា ឆ្នាំនេះជាខួបទី ៤៥ ឆ្នាំនៃការដែលប្រទេសចិនទទួលបានអាសនៈស្របច្បាប់ជាថ្មីនៅអង្គការសហប្រជាជាតិ ។ ក្នុងអំឡុងពេល ៤៥ ឆ្នាំកន្លងមកនេះ ឆ្លងតាមរយៈការប្រាស្រ័យទាក់ទងជាន់ខ្ពស់ និងការបង្កើនការប្រាស្រ័យទាក់ទងជាយុទ្ធសាស្រ្តនិងធ្វើឲ្យកិច្ចសហប្រតិបត្តិការជាក់ស្តែងមានភាពកាន់តែស៊ីជម្រៅ ភាគីចិនបានរួមសហការយ៉ាងស្អិតល្មួតជាមួយអង្គការសហប្រជាជាតិហើយទទួលបានសមិទ្ធផលយ៉ាងធំធេង ។ ប្រទេសចិនសកម្មរួមវិភាគទានដល់បុព្វហេតុនៃអង្គការសហប្រជាជាតិ ហើយក៏នឹងបន្តចូលរួមនិងគាំទ្រកិច្ចសហប្រតិបត្តិការលើគ្រប់វិស័យនៃអង្គការសហប្រជាជាតិ ធ្វើជាអ្នកគាំទ្រយ៉ាងមុតមាំចំពោះបុព្វហេតុនៃអង្គការសហប្រជាជាតិ និងអ្នកអនុវត្តយ៉ាងម៉ឺងម៉ាត់ចំពោះពហុភាគីនិយម ក៏ដូចជាអ្នកគាំពារយ៉ាងមុតមាំចំពោះរបៀបរៀបរយនិងសណ្តាប់ធ្នាប់អន្តរជាតិដែលចាត់ទុកកម្មវត្ថុនិងគោលការណ៍នៃធម្មនុញ្ញអង្គការសហប្រជាជាតិជាស្នូល ។
ជាការឆ្លើយតប លោក Guterres បានថ្លែងអំណរគុណដល់ភាគីចិនដែលបានផ្តល់ការគាំទ្រដ៏មានថ្លៃថ្លាចំពោះរូបលោកក្នុងការបំពេញតួនាទីជាអគ្គលេខាធិការនៃអង្គការសហប្រជាជាតិ ៕