ថ្ងៃទី២២ខែវិច្ឆិកាតាមម៉ោងតំបន់ សន្និសីទកំពូលនៃមគ្គុទេសក៍ប្រព័ន្ធសារព័ត៌មានប្រទេសចិននិងអាមេរិកឡាទីនដែលរៀបចំធ្វើដោយការិយាល័យព័ត៌មានក្រុមប្រឹក្សាកិច្ចការរដ្ឋចិននិងគណៈកម្មាធិការសេដ្ឋកិច្ចទ្វីបអាមេរិកឡាទីននិងការ៉ាបីននៃអង្គការសហប្រជាជាតិបានបើកធ្វើនៅទីក្រុងសាឌីអាហ្គួរដ្ឋធានីប្រទេសស៊ីលី។ លោក Wang GengNian អគ្គនាយកវិទ្យុអន្តរជាតិចិនបានថ្លែងសុន្ទរកថាក្នុងសន្និសីទ ដោយអំពាវនាវឲ្យប្រព័ន្ធសារព័ត៌មានចិននិងអាមេរិកឡាទីនពង្រីកវិស័យសហការគ្នា លើកកំពស់ស្រទាប់នៃកិច្ចសហការនិងសមិទ្ធផលនៃកិច្ចសហការ ពង្រឹងមូលដ្ឋាននៃមតិរបស់ប្រជាពលរដ្ឋ ជួយជំរុញដល់កិច្ចសហការរវាងចិននិងអាមេរិកឡាទីនឲ្យរីកចំរើនកាន់តែស៊ីជម្រៅ។
លោក Wang GengNian គូសបញ្ជាក់ថា តំបន់អាមេរិកឡាទីនជាតំបន់ដែលវិទ្យុអន្តរជាតិចិនផ្តោតកម្លាំងត្រួសត្រាយការផ្សាយសំឡេងជាប់រហូតមក។ប៉ុន្មានឆ្នាំកន្លងទៅ វិទ្យុអន្តរជាតិចិនបានបង្កើនល្បឿនរៀបចំបើកសាខាអង្គភាពនៅតំបន់អាមេរិកឡាទីន ធ្វើឲ្យកិច្ចសហការនៃប្រព័ន្ធសារព័ត៌មានកាន់តែស៊ីជម្រៅ ផលិតកម្មវិធីដែលមានឈ្មោះល្បី បានកកើតទៅជាសភាពនៃកិច្ចការពហុប្រព័ន្ធសារព័ត៌មាននៅតំបន់អាមេរិកឡាទីន។
លោក Wang Gengnian បានលើកឡើងនូវសំណើរចំនួនពីរស្តីពីប្រព័ន្ធសារព័ត៌មានរួមគ្នាជំរុញកិច្ចសហប្រតិបត្តិការជាក់ស្តែងរវាងចិននិងអាមេរិកឡាទីន។ ទី១គឺបង្កើនកិច្ចសហប្រតិបត្តិការនិងការផ្សព្វផ្សាយ ។ ប្រព័ន្ធសារព័ត៌មានរវាងចិននិងអាមេរិកឡាទីនត្រូវក្តាប់ខ្ជាប់នូវកាលានុវត្តភាពនៃការអភិវឌ្ឍន៍ការរួមបញ្ចូលគ្នាផ្នែកប្រព័ន្ធសារព័ត៌មាន បង្កើតវេទិកាចែករំលែកព័ត៌មានពហុភាសា បង្កើនកិច្ចសហប្រតិបត្តិការលើផ្នែកដូចជាការផ្សាយព័ត៌មាន ការប្រមូលព័ត៌មាន ការបណ្តុះបណ្តាលបុគ្គលិក និងការផ្លាស់ប្តូរបច្ចេកទេសជាដើម។ ទី២គឺបង្កើតគម្រោងកិច្ចសហប្រតិបត្តិការ។ លោកបានឧទ្ទេសនាមថា វិទ្យុអន្តរជាតិចិននឹងសម្រេចការផ្សព្វផ្សាយនៅកន្លែងផ្ទាល់នូវកម្មវិធីភាសាចិននិងការនិយាយពីប្រទេសចិនដែលជាកម្មវិធីល្អប្រណិតជាភាសាអេស្ប៉ាញ់នៅប្រព័ន្ធសារព័ត៌មានដែលសហការគ្នានៅអាមេរិកឡាទីន។
លោកស្រីAlicia Ba rcena អគ្គលេខាធិការប្រតិបត្តិនៃគណកម្មាធិការសេដ្ឋកិច្ចអាមេរិកឡាទីនបានសំដែងការកោតសរសើរចំពោះសុន្ទរកថារបស់អគ្គនាយកវិទ្យុលោក Wang Gengnian ។ លោកស្រីបានថ្លែងថា អ្នកសារព័ត៌មានវិទ្យុអន្តរជាតិចិនប្រចាំនៅអាមេរិកឡាទីនធ្លាប់ធ្វើបទសម្ភាសន៍ជាពិសេសជាច្រើនលើកចំពោះលោកស្រី មិនត្រឹមតែបង្ហាញពីកម្លាំងជាក់ស្តែងរបស់វិទ្យុអន្តរជាតិចិនក្នុងផ្នែកផ្សព្វផ្សាយប៉ុណ្ណោះទេ ថែមទាំងសបញ្ជាក់ថាវិទ្យុអន្តរជាតិចិនបានដើរតួនាទីសំខាន់ក្នុងការផ្លាស់ប្តូរផ្នែកមនុស្សសាស្រ្តរវាងចិននិងអាមេរិកឡាទីនទៀតផង៕