ថ្ងៃទី២០ខែវិចិ្ឆកា សន្និសីទក្រៅផ្លូវការរបស់អ្នកដឹកនាំលើកទី២៤នៃអង្គការសហប្រតិបត្តិការសេដ្ឋកិច្ចអាស៊ីប៉ាស៊ីហ្វីកបានបើកធ្វើនៅក្រុងលីម៉ាប្រទេសប៉េរូ ។ លោក Xi Jinping ប្រធានរដ្ឋចិនបានអញ្ជើញចូលរួមហើយថ្លែងសុន្ទរកថាសំខាន់ក្រោមចំណងជើងថា សម្លឹងមើលទៅកាន់អនាគតនិងត្រួសត្រាយការអភិវឌ្ឍន៍ ដើម្បីជំរុញការអភិវឌ្ឍន៍និងភាពរុងរឿងនៃអាស៊ីប៉ាស៊ីហ្វីក ដោយគូសបញ្ជាក់ថា ត្រូវធ្វើឲ្យទំនាក់ទំនងដៃគូអាស៊ីប៉ាស៊ីហ្វីកកាន់តែមានភាពស៊ីជម្រៅ យកការបើកទូលាយទៅស្វែងរកការឈ្នះ-ឈ្នះ យកការរួមបញ្ចូលគ្នាជំរុញភាពរុងរឿង ត្រួសត្រាយការអភិវឌ្ឍ៍ដោយឥតឈប់ឈរ ដើម្បីរួមគ្នាបង្កើតអនាគតល្អបវរនៃការអភិវឌ្ឍន៍អាស៊ីប៉ាស៊ីហ្វីក ។
ប្រធានបទនៃសន្និសីទក្រៅផ្លូវការរបស់អ្នកដឹកនាំនៃអង្គការសហប្រតិបត្តិការសេដ្ឋកិច្ចអាស៊ីប៉ាស៊ីហ្វីកលើកនេះគឺ កំណើនដ៏មានគុណភាពខ្ពស់និងការអភិវឌ្ឍន៍របស់មនុស្សជាតិ ។
លោក Xi Jinping បានថ្លែងក្នុងសុន្ទរកថាថា សន្និសីទកំពូលរបស់អ្នកដឹកនាំនៃក្រុមប្រទេស២០នៅក្រុង Hang zhou ដែលបើកធ្វើនៅខែកញ្ញាឆ្នាំនេះបានគូសផែនទីផ្លូវនៃកំណើនសេដ្ឋកិច្ចពិភពលោកដែលខ្លាំងក្លា ជានិរន្តរភាព តុល្យភាពនិងមានបរិយប័ន្ន បានបង្ហាញពីស្មារតីនៃទំនាក់ទំនងដៃគូដែលស្វាគមន៍ការសាកល្បងជាមួយគ្នា និងការប្តេជ្ញាចិត្តនៃការស្វែងរកការអភិវឌ្ឍន៍រួម ។ អង្គការសហប្រតិបត្តិការសេដ្ឋកិច្ចអាស៊ីប៉ាស៊ីហ្វីកមានតួនាទីសំខាន់ចំពោះការជំរុញការអភិវឌ្ឍន៍សេដ្ឋកិច្ចក្នុងតំបន់អាស៊ីប៉ាស៊ីហ្វីកនិងទូទាំងពិភពលោក ។
លោក Xi Jinping បានគូសបញ្ជាក់ថា យើងត្រូវលើកកម្ពស់កម្រិតសេដ្ឋកិច្ចដែលមានលក្ខណៈបើកទូលាយនៃអាស៊ីប៉ាស៊ីហ្វីកដោយមិនងាករេ គាំទ្ររបបពាណិជ្ជកម្មពហុភាគី ព្រមនិងបង្កើតតំបន់ពាណិជ្ជកម្មសេរីនៃអាស៊ីប៉ាស៊ីហ្វីកក្នុងពេលឆាប់ៗផងដែរ ។ យើងត្រូវបំបាត់ចោលភាពទាល់ច្រកនៃការតភ្ជាប់គ្នាក្នុងតំបន់ដោយមិនងាករេ អនុវត្តជាក់ស្តែងនូវគម្រោងផែនការនៃការតភ្ជាប់គ្នារយៈពេល១០ឆ្នាំដែលសន្និសីទក្រុងប៉េកាំងបានអនុម័ត បង្កើនការតភ្ជាប់គ្នារវាងការផ្តើមគំនិតនៃយុទ្ធសាស្ត្រខ្សែក្រវាត់មួយនិងផ្លូវមួយជាមួយនិងយុទ្ធសាស្ត្រនៃការអភិវឌ្ឍន៍និងការផ្តើមគំនិតនៃកិច្ចសហប្រតិបត្តិការរបស់ភាគីមានពាក់ព័ន្ធ ។