បន្ទាប់ពីបញ្ចប់បទឈប់បាញ់គ្នាផ្នែកមនុស្សធម៌និយមដែលបានដំណើរការអស់រយៈ៣ថ្ងៃ កងទ័ពរដ្ឋាភិបាលស៊ីរីនិងកងកម្លាំងប្រដាប់អាវុធប្រឆាំងរដ្ឋាភិបាលជាច្រើនកងបានកើតមានការប្រយុទ្ធគ្នាយ៉ាងក្តៅគគុកម្តងទៀតនៅAleppoដែលជាក្រុងនៅភាគខាងជើងប្រទេសស៊ីរីនៅថ្ងៃទី២២ខែតុលា។
តាមប្រព័ន្ធសារព័ត៌មានស៊ីរីផ្សាយដំណឹងថា ការបាញ់គ្នានេះសំខាន់គឺប្រមូលផ្តុំនៅតំបន់ភាគខាងកើតនៃក្រុងAleppoដែលត្រូវគ្រប់គ្រងដោយកងកម្លាំងប្រដាប់អាវុធបក្សពួកប្រឆាំងនិងអង្គការជ្រុលនិយម។នៅក្រោមការគាំទ្រពីការវាយប្រហារតាមអាកាស កងទ័ពរដ្ឋាភិបាលស៊ីរីបានទទួលការវិវឌ្ឍខាងយោធាក្នុងតំបន់Salah al-Din។
នាយទាហាននៃកងទ័ពរដ្ឋាភិបាលស៊ីរីដែលមិនព្រមបង្ហើបឈ្មោះមួយរូបបានប្រាប់អ្នកយកព័ត៌មាននៃទីភ្នាក់ងារសារព័ត៌មានស៊ីនហ្វាថា ក្នុងអំឡុងពេលបទឈប់បាញ់គ្នាខាងមនុស្សធម៌និយម គឺមានតែពួកប្រដាប់អាវុធនៃអង្គការAhrar al–Sham
ដែលជាកម្លាំងប្រដាប់អាវុធនៃបក្សពួកប្រឆាំង៧នាក់ប៉ុណ្ណោះបានចុះចាញ់ចំពោះកងទ័ពរដ្ឋាភិបាលស៊ីរី ហើយនៅមានប្រជាជនសមាញ្ញភាគតិចទៀតបានដកខ្លួនចេញពីតំបន់ភាគខាងកើតក្រុងAleppo។ផ្នែកយោធាស៊ីរីបានស្តីបន្ទោសអង្គការជ្រុលនិយមដែលបានបំផ្លាញបទឈប់បាញ់គ្នាលើកនេះដោយចេតនា រារាំងដល់ប្រជាជនសមាញ្ញដកខ្លួនចេញពីតំបន់Aleppo។
