រដ្ឋមន្ត្រីការបរទេសហ្វីលីពីនថ្លែងថា នឹងដកខ្លួនចេញពីការពឹងផ្អែកប្រទេសអាមេរិកដើម្បីស្វែងរកការទូតជាឯករាជ្យ

ថ្ងៃទី៦ខែតុលា លោក Perfecto Yasay រដ្ឋមន្ត្រីការបរទេសហ្វីលីពីនបានប្រកាសសេចក្តីថ្លែងការណ៍ដោយគូសបញ្ជាក់ថា រដ្ឋាភិបាលហ្វីលីពីននឹងដកខ្លួនចេញពីការពឹងផ្អែកប្រទេសអាមេរិក ដើម្បីស្វែងរកគោលនយោបាយការទូតឯករាជ្យ ។

កាលពីថ្ងៃទី៤ខែតុលា លោក Rodrigo Duterte ប្រធានាធិបតីហ្វីលីពីនបានថ្លែងថា លោកនឹងកែសម្រួលគោលនយោបាយការទូត ហើយប្រហែលនឹងផ្តាច់ទំនាក់ទំនងជាមួយប្រទេសអាមេរិកក្នុងអាណត្តិរបស់លោកនៅទីចុងបំផុត ។ សេចក្តីថ្លែងការណ៍របស់លោក Perfecto Yasay ត្រូវបានគេចាត់ទុកថា គឺជាការពន្យល់ជាក់ស្តែងចំពោះសុន្ទរកថារបស់លោក Rodrigo Duterte ។

ដោយឡែក កាលពីថ្ងៃទី២ខែតុលា លោក Rodrigo Duterte បានបញ្ជាឲ្យត្រួតពិនិត្យកិច្ចព្រមព្រៀងស្តីពីការបង្កើនកិច្ចសហប្រតិបត្តិការនៃកិច្ចការពារដែលប្រទេសហ្វីលីពីននិងអាមេរិកបានចុះហត្ថលេខានៅឆ្នាំ២០១៤កន្លងទៅ ហើយមិនលុបចោលលទ្ធភាពដែលទាមទារឲ្យកងទ័ពអាមេរិកដកខ្លួនចេញពីប្រទេសហ្វីលីពីនទាំងអស់នោះទេ ។ លោកបានអំពាវនាវសហគមន៍អន្តរជាតិម្តងទៀត កុំឲ្យជ្រៀតជ្រែកកិច្ចការផ្ទៃក្នុងរបស់ប្រទេសហ្វីលីពីន ហើយកុំនិយាយពីនេះពីនោះចំពោះសកម្មភាពបង្ក្រាបគ្រឿងញៀនរបស់ប្រទេសហ្វីលីពីន ។