ក្រោយពីក្រសួងការពារជាតិកូរ៉េខាងត្បូងបានកំណត់យកទីលានវាយកូនគោលរដ្ឋSeongju-gun ជាកន្លែងសម្រាប់ដាក់ពង្រាយប្រព័ន្ធប្រឆាំងមីស៊ីលTHAAD នៅថ្ងៃទី ៣០ ខែកញ្ញាមក ក៏បានរងការប្រឆាំងពីក្រុមប្រជាពលរដ្ឋ និងក្រុមសាសនាជាច្រើននៃប្រទេសកូរ៉េខាងត្បូងដោយពួកគេបានរៀបចំសកម្មភាពបាតុកម្ម ដើម្បីប្រឆាំងនឹងប្រព័ន្ធប្រឆាំងមីស៊ីលTHAAD ហើយបក្សប្រឆាំងនៃប្រទេសកូរ៉េខាងត្បូងក៏នាំគ្នាទិទៀនចំពោះរឿងនេះដែរ ។
ថ្ងៃដដែល សមាគមប្រជាពលរដ្ឋជាច្រើនបានរៀបចំសកម្មភាពបាតុកម្មនៅមុខស្ថាប័នការពារជាតិ ហើយអះអាងថា ក្នុងប្រទេសកូរ៉េខាងត្បូងគ្មានទីតាំងល្អសម្រាប់ដាក់ពង្រាយប្រព័ន្ធប្រឆាំងមីស៊ីលTHAADនោះទេ ការលុបចោលនូវការសម្រេចចិត្តអំពីការដាក់ពង្រាយទើបជាចម្លើយតែមួយគត់ ។
បក្សមិនកាន់អំណាចកូរ៉េខាងត្បូងក៏បាននាំគ្នាទិទៀនដែរថា ប្រការដែលរដ្ឋាភិបាលជ្រើសរើសទីតាំងសម្រាប់ដាក់ពង្រាយប្រព័ន្ធប្រឆាំងមីស៊ីលTHAAD ជាសេចក្តីសម្រេចចិត្តដ៏ប្រថុចញ៉ុចនិងមិនអាចធ្វើទៅបានទេ ។
ដោយឡែក ក្រសួងការពារជាតិកូរ៉េខាងត្បូងបានឲ្យដឹងទៀតថា នឹងខិតខំដោយពេញទំហឹងដើម្បីបញ្ចប់ការដាក់ពង្រាយប្រព័ន្ធប្រឆាំងមីស៊ីលTHAADក្នុងឆ្នាំក្រោយ សំដៅការពារសន្តិសុខជាតិនិងអាយុជីវិតប្រជាពលរដ្ឋដែលស្ថិតក្រោមការគំរាមកំហែងយ៉ាងធ្ងន់ធ្ងរពីមួយថ្ងៃទៅមួយថ្ងៃនូវអាវុធនុយគ្លេអ៊ែរនិងមីស៊ីលរបស់កូរ៉េខាងជើង ៕