ថ្ងៃទី២៩ខែកញ្ញា លោក Xi Jinping ប្រធានរដ្ឋចិនបានធ្វើកិច្ចពិភាក្សាការងារជាមួយនិងលោក Alexandr Lukashenko ប្រធានាធិបតីបេឡារុសនៅវិមានសភាប្រជាជនក្នុងក្រុងប៉េកាំង។ ប្រមុខរដ្ឋប្រទេសទាំងពីរសម្រេចចិត្តបង្កើតទំនាក់ទំនងភាពជាដៃគូយុទ្ធសាស្រ្តគ្រប់ជ្រុងជ្រោយរវាងចិននិងបេឡារុសដែលមានការជឿទុកចិត្តគ្នាទៅវិញទៅមកនិងសហប្រតិបត្តិការឈ្នះៗ អភិវឌ្ឍន៍មិត្តភាពរវាងភាគីទាំងពីរ ពួតដៃគ្នាបង្កើតសហគមន៍រួមផលប្រយោជន៍តែមួយនិងសហគមន៍រួមវាសនាតែមួយ។
លោក Xi Jinping បានវែកញែកថា កម្រិតស្និទស្នាលនៃការផ្លាស់ប្តូរនិងកិច្ចសហប្រតិបត្តិការរវាងប្រទេសទាំងពីរនាពេលបច្ចុប្បន្នបានកន្លងហួសពីកម្រិតនៃពេលវែលាណាមួយក៏ដោយក្នុងប្រវត្តិសាស្រ្ត ការអភិវឌ្ឍន៍ទំនាក់ទំនងទ្វេភាគីកំពុងឆ្ពោះទៅកាន់កម្រិតកាន់តែខ្ពស់ ។ ភាគីចិនរីករាយរួមជាមួយភាគីបេឡារុស គាំពារនិន្នាការដែលមានកម្លាំងខ្លាំងនៃការអភិវឌ្ឍន៍ទំនាក់ទំនងរវាងចិននិងបេឡារុស ក្តាប់ជាប់នូវកាលានុវត្តភាពដ៏កម្រមានដែលនាំមកដោយការរួមគ្នាកសាងយុទ្ធសាស្រ្ត"ខ្សែក្រវ៉ាត់មួយនិងផ្លូវមួយ" ដើម្បីចាក់បញ្ចូលកម្លាំងចលករថ្មីដល់ការអភិវឌ្ឍន៍ទំនាក់ទំនងប្រទេសទាំងពីរ បង្កើតផលប្រយោជន៍កាន់តែច្រើនដល់ប្រជាជនប្រទេសទាំងពីរ។
លោក Alexandr Lukashenko ជូនពរប្រទេសចិនដែលបានបើកធ្វើកិច្ចប្រជុំកំពូល ក្រុមប្រទេស២០ក្រុងHangzhouដោយជោគជ័យនិងបុណ្យជាតិចិនខួប៦៧ឆ្នាំដែលជិតនឹងមកដល់ ។ លោក Alexandr Lukashenko បានថ្លែងថា ក្នុងនាមជាដៃគូយុទ្ធសាស្រ្តគ្រប់ជ្រោងជ្រោយ ភាគីទាំងពីរមានផលប្រយោជន៍ដូចគ្នានិងវិស័យកិច្ចសហប្រតិបត្តិការដ៏ទូលំទូលាយ។ ភាគីបេឡារុសសកម្មគាំទ្រការផ្តួចផ្តើមយុទ្ធសាស្រ្ត"ខ្សែក្រវ៉ាត់មួយនិងផ្លូវមួយ"របស់ភាគីចិន ហើយរីករាយធ្វើការតភ្ជាប់យុទ្ធសាស្ត្រនេះជាមួយនិងយុទ្ធសាស្រ្តការអភិវឌ្ឍន៍របស់ខ្លួន ព្រមនិងធ្វើឲ្យកិច្ចសហប្រតិបត្តិការនៃការវិនិយោគសេដ្ឋកិច្ចរបស់ប្រទេសទាំងពីរលើកកម្ពស់ដល់កម្រិតថ្មីមួយ ជំរុញឲ្យការកសាងឧទ្យានឧស្សាហកម្មរវាងចិននិងបេឡារុសក្លាយទៅជាគម្រោងគំរូនៃការកសាងយុទ្ធសាស្រ្ត"ខ្សែក្រវ៉ាត់មួយនិងផ្លូវមួយ"៕