យប់ថ្ងៃទី៧ខែកញ្ញា តាមម៉ោងតំបន់ លោកលីខឺឈាំងនាយករដ្ឋមន្រ្តីចិនបានជួបពិភាក្សាជាមួយសម្តេចហ៊ុនសែននាយករដ្ឋមន្រ្តីកម្ពុជានៅមជ្ឈមណ្ឌលសន្និសីទជាតិក្រុងវៀងចន្ទន៍របស់ប្រទេសឡាវ។
លោកលីខឺឈាំងបានថ្លែងថា ប្រទេសចិននិងកម្ពុជាជាអ្នកជិតខាងល្អ មិត្តភ័ក្តិល្អ និងដៃគូល្អ។ភាគីចិននឹងខិតខំជំរុញកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយរវាងចិននិងកម្ពុជាយ៉ាងម៉ឺងម៉ាត់មិនងាករេ សំដៅគាំទ្រប្រទេសកម្ពុជាក្នុងការគាំពារអធិបតេយ្យភាពនិងឯករាជ្យភាព រក្សាស្ថិរភាពក្នុងប្រទេស ពន្លឿនការអភិវឌ្ឍសេដ្ឋកិច្ចនិងលើកកម្ពស់ឋានៈរបស់ខ្លួនលើផ្ទៃអន្តរជាតិ។លោកលីខឺឈាំងបានបង្ហាញទៀតថា សង្ឃឹមភាគីទាំងពីរបន្តធ្វើការខិតខំប្រឹងប្រែង ដើម្បីជំរុញកិច្ចសហប្រតិបត្តិការលើវិស័យសំខាន់ៗដូចជាសមត្ថភាពផលិតកម្ម សេដ្ឋកិច្ចនិងពាណិជ្ជកម្ម កសិកម្ម ធារាសាស្រ្តនិងកិច្ចកសាងហេដ្ឋារចនាសម្ព័ន្ធជាដើមឲ្យមានភាពកាន់តែស៊ីជម្រៅនិងប្រាកដប្រជា ក្នុងន័យជួយប្រទេសកម្ពុជាឲ្យអភិវឌ្ឍសេដ្ឋកិច្ចនិងសង្គមនិងកែលំអជីវភាពរស់នៅរបស់ប្រជាជន ហើយសម្រេចការផ្តល់ផលប្រយោជន៍ដល់គ្នាទៅវិញទៅមកនិងឈ្នះ–ឈ្នះឲ្យបានកាន់តែប្រសើរ។
ជាការឆ្លើយតប សម្តេចហ៊ុនសែនបានបង្ហាញថា ភាគីកម្ពុជាសូមថ្លែងអំណរគុណចំពោះភាគីចិនដែលបានផ្តល់ជំនួយដែលមានអំណោយផលដល់ជីវភាពរស់នៅរបស់ប្រជាជនកម្ពុជា ហើយកម្ពុជារីករាយក្នុងការបង្កើនការប្រាស្រ័យទាក់ទងជាន់ខ្ពស់ជាមួយភាគីចិន ពង្រីកកិច្ចសហប្រតិបត្តិការជាក់ស្តែង ព្រមទាំងជំរុញដល់ការអភិវឌ្ឍទំនាក់ទំនងរវាងអាស៊ាននិងចិនផងដែរ។