បន្ទាប់ពីប្រទេសកូរ៉េខាងជើងកំណត់ជាក់លាក់នូវការធ្វើសកម្មភាពបាញ់មីស៊ីលម្តងទៀតថ្ងៃទី ២៥ ខែសីហា លោកស្រីMaria Zakharova អ្នកនាំពាក្យក្រសួងការបរទេសរុស្ស៊ីបានអំពាវនាវប្រទេសមានពាក់ព័ន្ធឲ្យរក្សាការអត់ធ្មត់ កុំធ្វើឲ្យស្ថានការណ៍នៅឧបទ្វីបកូរ៉េមានភាពកាន់តែផុយស្រួយ ។ លោកស្រីមានប្រសាសន៍ថា ប្រទេសរុស្ស៊ីមានការព្រួយបារម្ភយ៉ាងខ្លាំងចំពោះរឿងដែលប្រទេសទាំងពីរកូរ៉េខាងត្បូងនិងអាមេរិកធ្វើសមយុទ្ធយោធារួមដែលមានទ្រង់ទ្រាយធំ ហើយសម្គាល់ថា សមយុទ្ធយោធានឹងធ្វើឲ្យភាគីកូរ៉េខាងជើងមានប្រតិកម្មអវិជ្ជមាន ដែលប្រហែលនឹងធ្វើឲ្យស្ថានការណ៍មានភាពកាន់តែអាប់អួថែមទៀត ។
លោកស្រីZakharova ថ្លែងថា សេចក្តីសម្រេចចិត្តអំពីការដាក់ពង្រាយប្រព័ន្ធប្រឆាំងមីស៊ីលTHAADនៅកូរ៉េខាងត្បូងរបស់សហរដ្ឋអាមេរិកជាកត្តារមួយទៀតដែលបណ្តាលឲ្យឧបទ្វីបកូរ៉េមានស្ថានការណ៍កាន់តែតានតឹង ។ ទង្វើនេះវាច្បាស់ណាស់គឺហួសពីក្របខ័ណ្ឌនៃការទប់ទល់នឹងការគំរាមកំហែងខាងនុយគ្លេអ៊ែរនិងមីស៊ីលរបស់កូរ៉េខាងជើង ។ សហរដ្ឋអាមេរិកពន្លឿនការដាក់ពង្រាយប្រព័ន្ធប្រឆាំងមីស៊ីលទូទាំងពិភពលោកនៅអាស៊ីប៉ាស៊ីហ្វិក ប្រាកដជាបំផ្លាញដល់តុល្យភាពជាយុទ្ធសាស្រ្តដែលមានស្រាប់នោះ ហើយនិងធ្វើឲ្យស្ថានការណ៍នៅឧបទ្វីបកូរ៉េនិងក្នុងតំបន់កាន់តែស្មុគស្មាញថែមទៀត ៕