ថ្ងៃទី១៨ខែកក្កដា សិក្ខាសាលាវិទ្យាការនៃឃ្លាំងគំនិតជាន់ខ្ពស់ស្តីពីបញ្ហាសមុទ្រចិនខាងត្បូងព្រមនិងការអភិវឌ្ឍនិងកិច្ចសហប្រតិបត្តិការក្នុងតំបន់ដែលមានរយៈពេល១ថ្ងៃបានបើកធ្វើនៅសិង្ហបុរី។ សិក្ខាសាលាលើកនេះបានប្រមូលផ្តុំនូវអ្នកជំនាញការនិងបញ្ញវន្តរាប់សិននាក់ដែលមកពីឃ្លាំងគំនិតរបស់ប្រទេសចិននិងប្រទេសជាច្រើននៅអាស៊ីអាគ្នេយ៍។ ពួកគេនឹងធ្វើការពិគ្រោះពិភាក្សាជុំវិញប្រធានបទធំទាំង៣ គឺយន្តការដោះស្រាយជម្លោះលើសមុទ្រ មធ្យោបាយដោះស្រាយជម្លោះសមុទ្រចិនខាងត្បូង ព្រមនិងកិច្ចសហប្រតិបត្តិការនិងការអភវិឌ្ឍក្នុងតំបន់សមុទ្រចិនខាងត្បូង។
លោក Zhao QiZheng ប្រធានវិជ្ជាស្ថានព័ត៌មាននៃសកលវិទ្យាល័យប្រជាជនចិនបានថ្លែងកថាក្នុងសិក្ខាសាលានេះ។លោកបានថ្លែងថា តុលាការមជ្ឈត្តកម្មជាបណ្តោះអាសន្នដែលបង្កើតឡើងតាមការទាមទាររបស់ហ្វីលីពីនគ្មានសិទ្ធិគ្រប់គ្រងទៅលើសំណុំរឿងនេះទាល់តែសោះ ហើយស្ថិតមានអំពើពង្រីកសិទ្ធិ ហួសពីសិទ្ធិនិងរំលោភបំពានសិទ្ធិដ៏ធ្ងន់ធ្ងរ។មជ្ឈត្តកម្មយ៉ាងនេះមុខជាឥតបានការនិងគ្មានកម្លាំងរឹតរួតនោះទេ។
មុនពេលបើកធ្វើសិក្ខាសាលា ពេលនិយាយដល់អ្វីដែលហៅថាសំណុំរឿងមជ្ឈត្តកម្មសមុទ្រចិនខាងត្បូង សាស្រ្តាចារ្យនៃវិទ្យាស្ថានច្បាប់របស់សកលវិទ្យាល័យច្បាប់និងនយោបាយប្រទេសថៃដែលបានចូលរួមសិក្ខាសាលានេះបានថ្លែងថា ប្រទេសអាស៊ានដែលក្នុងនោះបូករួមទាំងហ្វីលីពីនផងបានចុះហត្ថលេខាលើសេចក្តីប្រកាសប្រតិបត្តិរបស់បណ្តាភាគីនៅសមុទ្រចិនខាងត្បូងជាមួយប្រទេសចិន អនុលោមតាមសេចក្តីប្រកាសនេះ ប្រទេសអាស៊ានទាំងអស់សុទ្ធតែត្រូវធ្វើកិច្ចសន្ទនានិងការពិភាក្សាអំពីជម្លោះជាមួយប្រទេសចិនជាមុនសិន ដូច្នេះហើយហ្វីលីពីនគ្មានសិទ្ធិលើកឡើងមជ្ឈត្តកម្មដោយឯកតោភាគីឡើយ។
ពេលផ្តល់បទសម្ភាសន៍ជាមួយអ្នកសារព័ត៌មាន តំណាងនៃអង្គប្រជុំសុទ្ធតែអំពាវនាវឲ្យភាគីទាំង២ចិននិងហ្វីលីពីនដាក់ជម្លោះនៅមួយអន្លើសិន ត្រឡប់មកតុចរចាវិញដើម្បីជំរុញកិច្ចសហប្រតិបត្តិការនិងការអភិវឌ្ឍក្នុងតំបន់ឲ្យរីកចម្រើនថែមទៀត៕
