ថ្ងៃទី២៥ ខែតុលា «ខិត្តបណ្ណបង្ការជំងឺកូវីដ១៩នៃការប្រកួតកីឡាអូឡាំពិកនិងប៉ារ៉ាឡាំពិករដូវរងាក្រុងប៉េកាំងឆ្នាំ២០២២» បោះពុម្ពលើកទីមួយត្រូវបានចេញផ្សាយ ។ ក្នុងបរិបទដែលពិភពលោកទាំងមូលបាននិងកំពុងទប់ទល់នឹងការរីករាលដាលនៃជំងឺកូវីដ១៩ «ខិត្តបណ្ណបង្ការជំងឺកូវីដ១៩»នេះនឹងមានអំណោយផលដល់ការការពារឱ្យបានកាន់តែល្អនូវសុវត្ថិភាពនៃអត្តពលិកដែលចូលរួមការប្រកួតនិងបុគ្គលិកពាក់ព័ន្ធនៃការប្រកួតកីឡាអូឡាំពិក ។
លោក Huang Chun អនុប្រធានការិយាល័យបង្ការនិងគ្រប់គ្រងជំងឺកូវីដ១៩នៃគណៈកម្មាធិការរៀបចំការប្រកួតកីឡាអូឡាំពិករដូវរងាក្រុងប៉េកាំងបានថ្លែងថា ការប្រកួតកីឡាអូឡាំពិកនិងប៉ារ៉ាឡាំពិករដូវរងាក្រុងប៉េកាំងរៀបចំធ្វើក្នុងបរិបទនៃការរាតត្បាតនៃជំងឺកូវីដ១៩ ដែលនឹងនាំមកនូវហានិភ័យនាំចូលជំងឺឆ្លងដល់ទីក្រុងម្ចាស់ផ្ទះ ។ ក្នុងសភាពការណ៍បែបនេះ ចាំបាច់ត្រូវតាក់តែង «ខិត្តបណ្ណបង្ការជំងឺកូវីដ១៩» និងតម្រូវឱ្យមនុស្សគ្រប់រូបត្រូវគោរពតាមក្រមមូលដ្ឋានស្តីពីការបង្ការជំងឺកូវីដ១៩ ។
មន្ត្រីពាក់ព័ន្ធនៃគណៈកម្មាធិការរៀបចំការប្រកួតកីឡាអូឡាំពិករដូវរងាក្រុងប៉េកាំងបានថ្លែងថា គោលបំណងសំខាន់ជាងគេនៃការចេញផ្សាយ«ខិត្តបណ្ណបង្ការជំងឺកូវីដ១៩» គឺប្រាប់ទៅកាន់បុគ្គលិកដែលមកចូលរួមការប្រកួតកីឡាអូឡាំពិកនិងប៉ារ៉ាឡាំពិករដូវរងាក្រុងប៉េកាំងថា ត្រូវធ្វើដំណើរមកក្រុងប៉េកាំងតាមវិធីណា? ពេលមកដល់ហើយ ត្រូវធ្វើយ៉ាងម៉េច ត្រូវត្រៀមឯកសារណាខ្លះ? ក្នុងអំឡុងពេលការប្រកួត ត្រូវគោរការកំណត់ណាខ្លះ ? ដូច្នេះ ខិត្តបណ្ណនេះហាក់ដូចជា កូនសៀវភៅពន្យល់ពីការចូលរួមការប្រកួត ហើយបានបញ្ជាក់យ៉ាងច្បាស់ថា ត្រូវធ្វើយ៉ាងម៉េច បើមិនបានគោរពតាមការកំណត់ នោះត្រូវប្រឈមបញ្ហាអ្វី ខិត្តបណ្ណនេះបានធ្វើការពន្យល់ជាទូទៅពីសភាពការណ៍ពាក់ព័ន្ធទាំងអស់ ៕
