រសៀលថ្ងៃទី២៥ ខែតុលា ក្នុងសន្និសីទសារព័ត៌មានជាប្រចាំរបស់ក្រសួងការបរទសចិន មានអ្នកសារព័ត៌មានលើកសំណួរស្តីពីការដែលលោក Wang Yi សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីការបរទេសចិនទៅបំពេញទស្សកិច្ចនៅប្រទេសកាតាពីថ្ងៃទី២៥ ដល់ថ្ងៃទី២៦ ខែតុលា ព្រមនិងជួបសន្ទនាជាមួយគណៈប្រតិភូនៃរដ្ឋាភិបាលបណ្តោះអាសន្នរបស់អាហ្វហ្កានីស្ថាននៅក្រុងដូហា ។
ទាក់ទិននឹងសំណួរនេះ លោក Wang Wenbin អ្នកនាំពាក្យក្រសួងការបរទេសចិនបានថ្លែងថា ប្រទេសកាតា ជាប្រទេសសំខាន់នៅតំបន់ឈូងសមុទ្រនៃមជ្ឈិមបូព៌ា ហើយក៏ជាដៃគូសហប្រតិបតិ្តការដ៏សំខាន់របស់ប្រទេសចិនលើវិស័យថាមពល សេដ្ឋកិច្ចនិងពាណិជ្ជកម្មនៅតំបន់ឈូងសមុទ្រនៃមជ្ឈិមបូព៌ាផងដែរ ប្រទេសកាតាបានដើរតួនាទីនិងមានឥទ្ធិពលដ៏ពិសេសក្នុងបញ្ហាជាចំណុចក្តៅក្នុងតំបន់ ដូចជាបញ្ហាអាហ្វហ្កានីស្ថានជាដើម ។ ដំណើរទស្សនកិច្ចរបស់លោក Wang Yi សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីការបរទេសចិននឹងជំរុញថែមមួយកម្រិតទៀតនូវការអនុវត្តគំនិតឯកភាពរួមដ៏សំខាន់របស់ប្រមុខរដ្ឋនៃប្រទេសទាំងពីរស្តីពីការអភិវឌ្ឍទំនាក់ទំនងទ្វេភាគី ព្រមនិងកសាងទំនុកចិត្តនយោបាយរវាងគ្នានិងគ្នាឱ្យមានភាពកាន់តែស៊ីជម្រៅ បង្កើនកិច្ចសហប្រតិបតិ្តការជាក់ស្តែងទ្វេភាគី ក៏ដូចជាជំរុញទំនាក់ទំនងភាពជាដៃគូយុទ្ធសាស្ត្ររវាងចិននិងកាតាឱ្យទទួលបានការវិវឌ្ឍរីកចម្រើនថ្មីផងដែរ ។
ដោយឡែកភាគីចិននឹងអង្គការតាលីបង់ដែលជាអាជ្ញាធរកាន់អំណាចនៅអាហ្វហ្កានីស្ថានបានកំណត់ថា នឹងជួបសន្ទនានៅក្រុងដូហា ។ ឆ្លៀតឱកាសកិច្ចជំនួបនេះ ភាគីទាំងពីរនឹងធ្វើការផ្លាស់ប្តូរយ៉ាងស៊ីជម្រៅអំពីស្ថានការណ៍អាហ្វហ្កានីស្ថាន និងបញ្ហាពិភាក្សាដែលភាគីទាំងពីរយកចិត្តទុកដាក់ដូចគ្នា ៕
