ថ្ងៃទី ២៣ ខែកញ្ញា លោក Wang Yi សមាជិកក្រុមប្រឹក្សាកិច្ចការដ្ឋចិន និងជារដ្ឋមន្ត្រីការបរទេសចិនបានចូលរួមកិច្ចជំនួបរវាងរដ្ឋមន្ត្រីការបរទេសនៃប្រទេសជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិជាមួយនិងអគ្គលេខាធិការអ.ស.ប.។
ថ្លែងក្នុងកិច្ចជំនួប លោក Wang Yi បានលើកឡើងថា ពិភពលោកបច្ចុប្បន្នពោរពេញទៅដោយភាពមិនប្រាកដប្រជានិងមិននឹងនរ។ សហគមន៍អន្តរជាតិមានការរំពឹងទុកយ៉ាងខ្លាំងចំពោះប្រទេសជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ពិសេសរំពឹងថាប្រទេសទាំងប្រាំនេះអាចបង្កើនសាមគ្គីភាពនិងកិច្ចសម្របសម្រួល ដើម្បីបំពេញបន្ថែមជំនឿចិត្តនិងស្ថិរភាពដល់ពិភពលោក។
លោក Wang Yi បានសង្កត់ធ្ងន់ថា ទី១ ប្រទេសជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិទាំងប្រាំគួរដើរតួនាទីដើម្បីគាំពារសន្តិភាពពិភពលោក ទី២ ប្រទេសទាំងប្រាំគួរដើរតួនាទីដើម្បីអនុវត្តជាក់ស្តែងនូវពហុភាគីនិយម ទី៣ ប្រទេសទាំងប្រាំគួរដើរតួនាទីដើម្បីជំរុញការរួមសាមគ្គីគ្នាប្រយុទ្ធប្រឆាំងនឹងជំងឺឆ្លង ទី៤ ប្រទេសទាំងប្រាំគួរដើរតួនាទីដើម្បីជំរុញកិច្ចសហប្រតិបត្តិការសកល។
ក្នុងកិច្ចជំនួបលើកនេះគ្រប់ភាគីបានផ្លាស់ប្តូរមតិយោបល់អំពីបញ្ហាអាហ្វហ្កានីស្ថាន បញ្ហានុយក្លែអ៊ែរអ៊ីរ៉ង់ និងការបង្កើនកិច្ចសម្របសម្រួលរវាងប្រទេសជាសមាជិកអចិន្ត្រៃយ៍ទាំងប្រាំនៃក្រុមប្រឹក្សាសន្តិសុខ៕