ថ្ងៃទី ២៤ ខែកញ្ញា គេហទំព័រក្រសួងការបរទេសចិនបានបង្ហោះ « ឯកសារបញ្ជាក់ការពិតស្តីពីរឿងដែលអាមេរិកជ្រៀតជ្រែកកិច្ចការហុងកុង និងគាំទ្រកម្លាំងប្រឆាំងចិនធ្វើកុបកម្មនៅហុងកុង »។
«ឯកសារបញ្ជាក់ការពិត» បានបង្ហាញថា៖ ទីមួយ អាមេរិកបានតាក់តែងច្បាប់ពាក់ព័ន្ធនឹងហុងកុង ដើម្បីលាបពណ៌លើនយោបាយហុងកុងរបស់ចិន បានជ្រៀតជ្រែកកិច្ចការផ្ទៃក្នុងហុងកុង ក្នុងបំណងជ្រៀតជ្រែកកិច្ចការផ្ទៃក្នុងរបស់ចិន។ ទីពីរ អាមេរិកបានដាក់ទណ្ឌកម្មក្នុងការប៉ុនប៉ងរារាំងការអនុវត្តច្បាប់សន្តិសុខជាតិនៅហុងកុងនិងសេចក្តីសម្រេចចិត្តពាក់ព័ន្ធនៃសភាតំណាងប្រជាជនទូទាំងប្រទេសចិននៅហុងកុង។ ទីបី អាមេរិកបានមួលបង្កាច់និងចោទប្រកាន់ដោយគ្មានមូលដ្ឋានលើកិច្ចការរដ្ឋបាល និងសកម្មភាពអនុវត្តច្បាប់នៃកងកម្លាំងប៉ូលីសហុងកុង ក្នុងបំណងបំផ្លាញភាពរុងរឿងនិងស្ថិរភាពនៃហុងកុង ។ ទីបួន អាមេរិកបានផ្តល់កន្លែងជ្រកកោននិងគាំទ្រដល់ពួកប្រឆាំងចិនឱ្យធ្វើកុបកម្មនៅហុងកុង តាមរយៈការផ្តល់វេទិកាផ្សព្វផ្សាយពាក្យចចាមអារ៉ាមនយោបាយ ។ ទីប្រាំ អាមេរិកបានដាក់កម្លាំងសម្ពាធនិងកៀរគរសម្ព័ន្ធមិត្តជាច្រើនដើម្បីរួមគ្នាជ្រៀតជ្រែកកិច្ចការហុងកុង ព្រមទាំងនិយាយឆ្ការដៃឆ្ការជើង អំពីកិច្ចការហុងកុងតាមរយៈវិធីដូចជាការចេញសេចក្តីថ្លែងការណ៍រួមជាដើម៕