ថ្ងៃទី២២ ខែមិថុនា លោកស្រី គូលីណាល អ៊ូភូលី អនុប្រធានសមាគមវិទ្យាសាស្ត្រនៃភូមិភាគស្វយ័តវៃវូអឺស៊ីនជាំងរបស់ប្រទេសចិនបានតំណាងឱ្យគណៈប្រតិភូរដ្ឋាភិបាលចិនថ្លែងសុន្ទរកថាក្នុងកិច្ចសន្ទនានៃឧត្តមស្នងការទទួលបន្ទុកសិទ្ធិមនុស្សរបស់សន្និសីទក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៧ ដោយបានធ្វើបទបង្ហាញពីសមិទ្ធផលអភិវឌ្ឍន៍នៃសេដ្ឋកិច្ចសង្គមនិងសិទ្ធិមនុស្សរបស់តំបន់ស៊ីនជាំងក្នុងរយៈពេលប៉ុន្មានឆ្នាំចុងក្រោយនេះ។
លោកស្រី គូលីណាល អ៊ូភូលី បានថ្លែងថា បច្ចុប្បន្ននេះ ស្ថានការណ៍ទូទៅនៃសង្គមស៊ីនជាំងមានភាពកាន់តែល្អប្រសើរឡើងនិងប្រកបដោយស្ថិរភាព ហើយមិនបានកើតមានសំណុំរឿងភេរវកម្មនិងកម្លាំងហិង្សាក្នុងរយៈពេល៤ឆ្នាំជាប់ៗគ្នា ។ លើវិស័យសេដ្ឋកិច្ចវិញ បានសម្រេចបាននូវការអភិវឌ្ឍប្រកបដោយគុណភាពខ្ពស់ កម្លាំងសេដ្ឋកិច្ចចម្រុះត្រូវបានលើកកម្ពស់ដល់កម្រិតថ្មី យុទ្ធនាការពុះពារឧបសគ្គក្នុងការលុបបំបាត់ភាពក្រីក្រទទួលបានជោគជ័យដោយគ្រប់ជ្រុងជ្រោយ ជនក្រីក្រនៅជនបទដែលស្ថិតនៅក្រោមខ្សែបន្ទាត់ស្តង់ដាភាពក្រីក្រ ចំនួន៣លាន៦ម៉ឺន៤ពាន់៩រយនាក់បានចេញផុតពីភាពក្រីក្រទាំងអស់ ភូមិក្រីក្រចំនួន៣៦៦៦សុទ្ធតែត្រូវបានលុបបំបាត់ភាពក្រីក្រ ហើយស្រុកក្រីក្រចំនួន៣៥ បានលុបបំបាត់ភាពក្រីក្រទាំងអស់ ជីវភាពរស់នៅរបស់ប្រជាជនទទួលបានកែលំអយ៉ាងច្បាស់លាស់ ។ សាមគ្គីភាពជនជាតិត្រូវបានពង្រឹងថែមមួយកម្រិតទៀត ប្រជាជនគ្រប់ជនជាតិសាមគ្គីគ្នាដូចគ្រាប់ផ្លែទទឹមដែលក្រសោបគ្នា ។ ចំណែកវិស័យសាសនា ក៏មានភាពសុខដុមរមនា ការធ្វើបូជនីយកិច្ចនិងតម្រូវការខាងសាសនាជាប្រក្រតីរបស់អ្នកកាន់សាសនា ទទួលបានការធានាតាមផ្លូវច្បាប់ ។ ប្រជាជនគ្រប់ជនជាតិអាចទទួលបានដោយសមភាពនូវស្ថិរភាព សុវត្ថិភាព ការអភិវឌ្ឍនិងភាពរីកចម្រើន ក៏ដូចជាការទទួលបានសុភមង្គលនិងសុវតិ្ថភាពផ្លូវចិត្តបានកើនឡើងយ៉ាងច្បាស់លាស់ ។
លោកស្រី គូលីណាល អ៊ូភូលី បានថ្លែងទៀតថា ការអភិវឌ្ឍកិច្ចការសិទ្ធិមនុស្សនៃតំបន់ស៊ីនជាំង បានទទួលស្គាល់ពីសំណាក់ពិភពលោកទាំងមូល ហើយទទួលបានការវាយតម្លៃយ៉ាងសកម្មពីសហគមន៍អន្តរជាតិផងដែរ មិនថាកម្លាំងប្រឆាំងប្រទេសចិនណាមួយសុទ្ធតែមិនអាចបំផ្លិចបំផ្លាញដល់ស្ថានការណ៍ដ៏ល្អប្រសើរប្រកបដោយសុខសន្តិភាពនិងសាមគ្គីភាពនៅតំបន់ស៊ីនជាំងនោះឡើយ ៕
