ថ្ងៃទី២២ ខែមិថុនា ក្នុងសន្និសីទក្រុមប្រឹក្សាសិទ្ធិមនុស្សអង្គការសហប្រជាជាតិលើកទី៤៧ ដែលបើកធ្វើនៅក្រុង ហ្សឺណែវ ប្រទេសបេឡារុសបានតំណាងប្រទេសចំនួន៦៥ ថ្លែងសុន្ទរកថារួម ដោយបានគូសបញ្ជាក់ថា ការគោរពអធិបតេយ្យភាព ឯករាជ្យភាពនិងបូរណភាពទឹកដី មិនជ្រៀតជ្រែកកិច្ចការផ្ទៃក្នុងរបស់ប្រទេសមានអធិបតេយ្យភាពជាក្រមមូលដ្ឋាននៃទំនាក់ទំនងអន្តរជាតិ ។ កិច្ចការហុងកុង ស៊ីនជាំង ស៊ីចាំងជាកិច្ចការផ្ទៃក្នុងរបស់ប្រទេសចិន មជ្ឈដ្ឋានខាងក្រៅមិនត្រូវលូតដៃចូលទេ ។ យើងសូមគាំទ្រប្រទេសចិនក្នុងការអនុវត្តគោលការណ៍ “ប្រទេសមួយប្រព័ន្ធគ្រប់គ្រងពីរ” នៅតំបន់រដ្ឋបាលពិសេសហុងកុង ។
សុន្ទរកថារួមបានអំពាវនាវឱ្យគោរពកម្មវត្ថុនិងគោលការណ៍នៃធម្មនុញ្ញអង្គការសហប្រជាជាតិ និងគោរពគោលការណ៍ដែលប្រើប្រាស់ជាទូទៅ មានភាពយុត្តិធម៌ សត្យានុម័តនិងមិនបាច់ជ្រើសរើសជាដើម ត្រូវគោរពសិទ្ធិរបស់ប្រជាជននៃបណ្តាប្រទេសនានាដែលអាចជ្រើសរើសដោយម្ចាស់ការនូវផ្លូវអភិវឌ្ឍន៍សិទ្ធិមនុស្សស្របតាមសភាពការណ៍ជាតិរបស់ខ្លួន ព្រមនិងគោរពសិទ្ធិមនុស្សគ្រប់បែបយ៉ាងដោយស្មើភាព ។
ក្រៅពីថ្លែងសុន្ទរកថារួម រដ្ឋសមាជិកទាំង៦នៃក្រុមប្រឹក្សាសហប្រតិបតិ្តការឈូងសមុទ្រ ក៏បានរួមគ្នាផ្ញើរលិខិតដើម្បីសម្តែងការគាំទ្រដល់គោលជំហររបស់ប្រទេសចិន ហើយក៏មានប្រទេសជាង២០ ត្រៀមថ្លែងសុន្ទរកថាដោយរៀងៗខ្លួន ដើម្បីគាំទ្រប្រទេសចិន ពោលគឺរួមទាំងអស់ មានប្រទេសលើសពី៩០បានសម្តែងការយោគយល់និងគាំទ្រតាមរយៈវិធីខុសៗគ្នាចំពោះគោលជំហរដ៏យុត្តិធម៌របស់ប្រទេសចិន ៕