តាមការផ្សាយនៃប្រព័ន្ធសារព័ត៌មាន NHK របស់ជប៉ុនកាលពីថ្ងៃទី២០ខែមិថុនាបានឱ្យដឹងថា ក្រុមហ៊ុនថាមពលអគ្គិសនីក្រុងតូក្យូរបស់ជប៉ុនដែលទទួលខុសត្រូវចំពោះការចាត់ចែងទឹកសំណល់នុយគ្លេអ៊ែរនៅខេត្ត Fukushima កំពុងសុំមតិយោបល់ស្តីពីបច្ចេកទេសអាចប្រើបានចំពោះសង្គមជាសាធារណៈ ដើម្បីច្រោះធាតុ Tritium ក្នុងទឹកសំណល់នុយគ្លេអ៊ែរ ។ បន្ទាប់ពីដំណឹងនេះត្រូវបានផ្សាយ មតិសាធារណៈមានការភ្ញាក់ផ្អើលយ៉ាងខ្លាំង ។ មានអ្នកប្រើប្រាស់បណ្តាញអ៊ីនធើណេតសួរដេញដោលថា សូម្បីតែបច្ចេកទេសច្រោះក៏មិនចេះច្បាស់ ម៉េចរដ្ឋាភិបាលជប៉ុនក៏ហ៊ានសម្រេចចិត្តបង្ហូរទឹកសំណល់នុយគ្លេអ៊ែរទៅក្នុងសមុទ្រ?
តាមការពិត ចាប់តាំងពីភាគីជប៉ុនបានសម្រេចចិត្តដោយឯកតោភាគីថា នឹងចាប់ផ្តើមអនុវត្តផែនការបង្ហូរទឹកសំណល់នុយគ្លេអ៊ែរទៅក្នុងសមុទ្រកាលពីខែមេសាឆ្នាំនេះមក ប្រទេសជិតខាងនិងមតិសាធារណៈលើផ្ទៃអន្តរជាតិបានថ្កោលទោសចំពោះការនេះឥតឈប់ឈរ ។ ប៉ុន្តែភាគីជប៉ុននៅតែធ្វើតាមតែទំនើងចិត្តរបស់ខ្លួន ហើយប្រើពាក្យកុហកទៅឆ្លើយតបនឹងការចោទជាមន្ទិលសង្ស័យរបស់ពិភពលោកជាបន្តបន្ទាប់ ។ ទាក់ទិននឹងបញ្ហាដ៏រសើបនិងគន្លឹះមួយចំនួនដូចជា “តើនឹងចាត់ចែងទឹកសំណល់នុយគ្លេអ៊ែរតាមរបៀបណា?”និង “បន្ទាប់ពីបង្ហូរទឹកសំណល់នុយគ្លេអ៊ែរទៅក្នុងសមុទ្រនឹងបង្កផលប៉ះពាល់មានលក្ខណៈគ្រោះមហន្តរាយណាខ្លះ?”ជាដើម ភាគីជប៉ុនបានបិទបាំងការពិតជាប់រហូតមក ។
ក្នុងរយៈពេលជាយូរណាស់មកហើយ មិនថារដ្ឋាភិបាលជប៉ុនឬក៏ក្រុមហ៊ុនថាមពលអគ្គិសនីក្រុងតូក្យូរបស់ជប៉ុនក្តី សុទ្ធតែតែងតែនិយាយពាក្យកុហកលើបញ្ហាដោះស្រាយដោយសុវត្ថិភាពនូវរោងចក្រអគ្គិសនីដើរដោយថាមពលនុយគ្លេអ៊ែរ ។ ឧទាហរណ៍ដូចជា នៅពាក់កណ្តាលខែឧសភាឆ្នាំនេះ រោងចក្រអគ្គិសនីដើរដោយថាមពលនុយគ្លេអ៊ែរនៃខេត្ត Fukushima បានកើតឧប្បត្តិហេតុធ្លាយកុងតឺន័រដែលស្តុកទុកទឹកសំណល់នុយគ្លេអ៊ែរ បណ្តាលឱ្យទឹកសំណល់នុយគ្លេអ៊ែរដែលមានសារធាតុវិទ្យុសកម្មមួយចំនួនហូរចូលក្នុងសមុទ្រ ។ ប៉ុន្តែក្រុមហ៊ុនថាមពលអគ្គិសនីក្រុងតូក្យូរបស់ជប៉ុនលាក់បាំងមិនរាយការណ៍ពីរឿងនេះ រហូតដល់ត្រូវប្រព័ន្ធសារព័ត៌មានបែកធ្លាយទើបទទួលសារភាពដោយស្ទាក់ស្ទើរ ។
ក្រុមហ៊ុនដែលត្រូវបែកធ្លាយជាញឹកញាប់នូវរឿងអាស្រូវលាក់បាំងការពិតបែបនេះ គ្មានសច្ចភាពនិងមិនគោរពពាក្យសន្យាទាល់តែសោះ ។ តើភាគីជប៉ុនអាចធានានូវភាពត្រឹមត្រូវនៃទិន្នន័យនិងព័ត៌មានដែលក្រុមហ៊ុននេះបានផ្តល់ដោយឯកតោភាគីយ៉ាងដូចម្តេច?ហើយក្រុមហ៊ុនថាមពលអគ្គិសនីក្រុងតូក្យូរបស់ជប៉ុនសុំមតិយោបល់អំពីបច្ចេកទេសច្រោះធាតុ Tritium លើកនេះ ប្រហែលគ្រាន់តែសម្តែងឆាកល្ខោនចំពោះមជ្ឈដ្ឋានខាងក្រៅប៉ុណ្ណោះ ។
ក្នុងប្រវត្តិសាស្ត្រ ប្រទេសជប៉ុនបាននាំមកនូវគ្រោះមហន្តរាយមនុស្សធម៌ដ៏ខ្លាំងក្លាដល់ប្រទេសជាច្រើនដោយសារបំផុសសង្គ្រាមឈ្លានពាន ប៉ុន្តែគិតមកទល់បច្ចុប្បន្ននេះ អ្នកនយោបាយជប៉ុននៅតែមិនព្រមសុំអភ័យទោសដោយស្មោះត្រង់ដដែល ។ បច្ចុប្បន្ននេះ ភាគីជប៉ុនចចេសអនុវត្តផែនការ “បង្ហូរទឹកសំណល់នុយគ្លេអ៊ែរទៅក្នុងសមុទ្រ”ដែលនឹងបង្កជាផលប៉ះពាល់ដល់សុខភាពនិងអាយុជីវិតរបស់ប្រជាជនទូទាំងពិភពលោកនិងអេកូបរិស្ថានសកល ក៏ដូចជាបំពានភាពយុត្តិធម៌និងសតិសម្បជញ្ញៈរបស់មនុស្សជាតិផងដែរ ។
សហគមន៍អន្តរជាតិដាច់ខាតមមិនអនុញ្ញាតឱ្យភាគីជប៉ុនធ្វើតាមតែទំនើងចិត្តរបស់ខ្លួនទេ ។ ភាគីជប៉ុនកុំចង់ធ្វើការខ្ជីខ្ជានិងបន្លំយករួចខ្លួនលើបញ្ហាបង្ហូរទឹកសំណល់នុយគ្លេអ៊ែរនៅខេត្ត Fukushima ទៅក្នុងសមុទ្រ ៕