ក្នុងឱកាសគម្រប់ខួប ១០០ ឆ្នាំនៃការបង្កើតបក្សកុម្មុយនិស្តចិន នាថ្ងៃទី ១៨ ខែមិថុនា ឆ្នាំ២០២១ លោក Xi Jinping ប្រមុខរដ្ឋចិនបានអញ្ជើញទៅសារមន្ទីរតាំងពិព័រណ៍ប្រវត្តិសាស្ត្រនៃបក្សកុម្មុយនិស្តចិនដែលស្ថិតនៅទីក្រុងប៉េកាំង ដើម្បីចូលរួមទស្សនា “ពិព័រណ៍ប្រវត្តិសាស្ត្រនៃបក្សកុម្មុយនិស្តចិន”ក្រោមប្រធានបទ«មិនបំភ្លេចបំណងដើម ចងចាំបេសកកម្ម»។
លោក Xi Jinping បានគូសបញ្ជាក់ថា រំលឹកពីមាគ៌ាតស៊ូនាអតីតកាល សំឡឹងមើលមាគ៌ាតស៊ូនាអនាគត ចាំបាច់ត្រូវសិក្សានិងបូកសរុបឱ្យបានល្អនូវប្រវត្តិសាស្ត្របក្ស ដើម្បីបន្តវេននិងផ្សព្វផ្សាយឱ្យបានល្អនូវបទពិសោធន៍ដ៏មានតម្លៃនៃបក្ស ក្នុងន័យបន្តទទួលបានកម្លាំងឈានទៅមុខជានិច្ចពីក្នុងប្រវត្តិសាស្ត្រខិតខំតស៊ូនៃបក្សកុម្មុយនិស្តចិន។
“ពិព័រណ៍ប្រវត្តិសាស្ត្រនៃបក្សកុម្មុយនិស្តចិន”ក្រោមប្រធានបទ«មិនបំភ្លេចបំណងដើម ចងចាំបេសកកម្ម» បានតាំងបង្ហាញពីគំនូរចំនួនជាង ២៦០០ ផ្ទាំង និងវត្ថុប្រវត្តិសាស្ត្រចំនួនជាង ៣៥០០ ក្នុងនោះរួមទាំង គំនូរខ្មុកម្រាក់អំពីមហាកំពែង សាត្រាស្លឹករឹតនៃសៀវភៅកត់ត្រាក្បាលទី៤នៃ«សៀវភៅកត់ត្រានៅក្រុងប្រ៊ុចសែល» របស់លោក Karl Heinrich Marx វីដេអូឯកសារនៃពិធីអបអរសាទរការបង្កើតសាធារណរដ្ឋប្រជាមានិតចិន អាវុធដែលត្រូវបានប្រើប្រាស់ក្នុងសង្គ្រាមជួយកូរ៉េខាងជើងប្រយុទ្ធប្រឆាំងនឹងការឈ្លានពាននៃអាមេរិក រូបភាពអំពីការបង្កើតតំបន់សេដ្ឋកិច្ចពិសេស តារាងទិន្នន័យនៃយុទ្ធនាការពុះពារឧបសគ្គក្នុងការលុបបំបាត់ភាពក្រីក្រជាដើម។ ពិព័រណ៍នេះបានបង្ហាញដោយគ្រប់ជ្រុងជ្រោយជាលើកទីមួយ អំពីប្រវត្តិសាស្ត្រមួយរយឆ្នាំដ៏អស្ចារ្យនៃបក្សកុម្មុយនិស្តចិន ក៏ដូចជាភាពលំបាកលំបិនក្នុងការខិតខំតស៊ូដើម្បីអភិវឌ្ឍសាធារណរដ្ឋប្រជាមានិតចិននិងសង្គមនិយមប្រកបដោយលក្ខណៈពិសេសចិន៕