ថ្ងៃទី១២ឧសភា តាមម៉ោងក្នុងតំបន់ អាមេរិក អង់គ្លេសនិងអាល្លឺម៉ង់ព្រមនិងប្រទេសនិងអង្គការក្រៅរដ្ឋាភិបាលមួយចំនួនតូចបានប្រើប្រាស់ដោយផ្តេសផ្តាសនូវប្រភពធនធាននិងវេទិការបស់អង្គការសហប្រជាជាតិ ដោយបានរៀបចំកិច្ចប្រជុំដែលហៅថាសភាពការណ៍សិទ្ធិមនុស្សនៅតំបន់ស៊ីនជាំងនៃប្រទេសចិន ក្នុងន័យប៉ុនប៉ងបិទស្លាកដែលហៅថា“ ប្រល័យពូជសាសន៍” និង “បង្ខិតបង្ខំឱ្យធ្វើពលកម្ម”ជាដើមទៅលើប្រទេសចិន។ ទង្វើបែបនេះជាការបំពានយ៉ាងកម្រោលទៅលើធម្មនុញ្ញអង្គការសហប្រជាជាតិ ដែលត្រូវរដ្ឋសមាជិកជាច្រើននៃអង្គការសហប្រជាជាតិធ្វើពហិការ ។
មនុស្សដែលបានយល់ដឹងពីប្រវត្តិសាស្ត្រនៃតំបន់ស៊ីនជាំងសុទ្ធតែដឹងច្បាស់ថា ធាតុពិតនៃបញ្ហាពាក់ព័ន្ធនឹងតំបន់ស៊ីនជាំង គឺបញ្ហាប្រឆាំងភេរវកម្មនិងលុបបំបាត់សកម្មភាពជ្រុលនិយម មិនមែនបញ្ហាសិទ្ធិមនុស្សដែលប្រទេសលោកខាងលិចមួយចំនួនតូចតែងតែឃោសនាបំប៉ោងនោះទេ ។ បើសិនជាចង់និយាយពីបញ្ហាសិទ្ធិមនុស្ស យើងអាចធ្វើការប្រៀបធៀបដូចខាងក្រោម ។
សូមយកការងារបង្ការនិងគ្រប់គ្រងការរីករាលដាលនៃជំងឺកូវីដ១៩ជាឧទាហរណ៍ ។ អ្នកនាំពាក្យនៃគណៈប្រតិភូចិនប្រចាំជាអចិន្ត្រៃយ៍នៅអង្គការសហប្រជាជាតិបានបង្ហាញតួលេខមួយចំនួន៖ តំបន់ស៊ីនជាំង មានប្រជាជនចំនួនជាង២៥លាននាក់ បានរកឃើញករណីឆ្លងជំងឺកូវីដ១៩ សរុប៩៨០នាក់ ករណីជាសះស្បើយ៩៧៧នាក់ ករណីស្លាប់៣នាក់ ។ រីឯនៅប្រទេសអាមេរិកវិញ ករណីស្លាប់មានចំនួនជិត៦សែននាក់ អង់គ្លេសមានករណីស្លាប់ចំនួនជាង១២ម៉ឺននាក់ អាល្លឺម៉ងមានករណីស្លាប់លើសពី៨ម៉ឺននាក់ ។ ប្រទេសលោកខាងលិចមួយចំនួនតូច សម្បីតែសិទ្ធិរស់រានមានជីវិតរបស់ប្រជាពលរដ្ឋខ្លួនក៏មិនអាចធានាបាន តើមានលក្ខណសម្បតិ្តអីក្នុងការរិះគន់សភាពការណ៍សិទ្ធិមនុស្សនៃតំបន់ស៊ីនជាំង ?
ប្រទេសលោកខាងលិចមួយចំនួនតូចមិនអាចតំណាងឱ្យអង្គការសហប្រជាជាតិ ហើយកាន់តែមិនអាចតំណាងឱ្យសហគមន៍អន្តរជាតិនោះទេ ។ ក្នុងមហាសន្និបាតលើកទី៤៦ នៃក្រុមប្រឹក្សាសិទ្ធិមនុស្សអង្គការសហប្រជាជាតិ ប្រទេសចំនួនជាង៨០ ក្នុងនោះបូករួមទាំងប្រទេសឥស្លាម ដូចជាអារ៉ាប៊ីសាអូឌីតនិងអេមីរ៉ាតអារ៉ាប់រួមជាដើម បានបញ្ចេញសម្លេងតាមទម្រង់ខុសៗគ្នា ដើម្បីផ្តល់ការគាំទ្រដល់គោលជំហររបស់ប្រទេសចិនក្នុងបញ្ហាពាក់ព័ន្ធនឹងតំបន់ស៊ីនជាំង ។ នាពេលថ្មីៗកន្លងទៅនេះ ក្នុងអំឡុងពេលរៀបចំធ្វើកិច្ចជំនួបរវាងរដ្ឋមន្ត្រីការបរទេសនៃប្រទេសចិននិងប្រទេសអាស៊ីកណ្តាលចំនួន៥ ប្រទេសអាស៊ីកណ្តាលក៏បានផ្តល់ការគាំទ្រយ៉ាងមុតមាំដល់ប្រទេសចិនក្នុងការគាំពារផលប្រយោជន៍ជាស្នូលរបស់ខ្លួន ហើយប្រឆាំងនឹងការជ្រៀតជ្រែកកិច្ចការផ្ទៃក្នុងរបស់ប្រទេសចិន ។
នាពេលថ្មីៗកន្លងទៅនេះ ប្រព័ន្ធសារព័ត៌មាននៃប្រទេសជាច្រើន ដូចជាអូស្ត្រាលី ប្រេស៊ីល សិង្ហបុរីនិងស៊ុយអែតជាដើម ក៏បានចេញផ្សាយអត្ថបទ ដើម្បីទទួលស្គាល់សមិទ្ធផលរបស់តំបន់ស៊ីនជាំងលើវិស័យប្រឆាំងភេរវកម្ម ក្នុងន័យលាតត្រដាងនូវកលល្បិចនៃភូមិសាស្ត្រនយោបាយរបស់អាមេរិកនិងប្រទេសលោកខាងលិចដែលប៉ុនប៉ង“ទប់ស្កាត់ការអភិវឌ្ឍរបស់ប្រទេសចិនដោយយកបញ្ហាស៊ីនជាំងធ្វើជាលេស” ។
មិនថាអាមេរិកចាត់ប្រើមធ្យោបាយណាក្នុងការប្រមូលគ្នីគ្នាសម័្ពន្ធមិត្តលោកខាងលិចមួយចំនួនតូចនិងនិយាយប្រែសជាខ្មៅក៏ដោយ ក៏ប៉ុន្តែ រឿងកំប្លែងខាងនយោបាយលើមូលដ្ឋានពាក្យកុហក បានបរាជ័យនៅលើឆាកអង្គការសហប្រជាជាតិរួចរាល់ហើយ ។ បើសិនជាពួកគេមិនបញ្ឈប់ការសម្តែងឆាកល្ខោនដ៏អាក្រក់បែបនេះ នោះនៅទីបំផុតនឹងក្លាយជាអ្នកញៀនល្បែងខាងនយោបាយដែលមានភាពភិតភ័យជារៀងរាល់ថ្ងៃ ហើយនឹងបាត់បង់កេរ្តិ៍ឈ្មោះទាំងអស់ ៕
