ថ្លែងក្នុងវេទិកាតាមអនឡាញនៅថ្ងៃទី១៣ ខែឧសភា លោក Kishore Mahbubani សាស្ត្រាចារ្យនៃសកលវិទ្យាល័យជាតិសិង្ហបុរីបានលើកឡើងថា សេដ្ឋកិច្ចសកលរងការវាយប្រហារយ៉ាងធ្ងន់ធ្ងរពីការរីករាលដាលនៃជំងឺកូវីដ១៩ អាមេរិកគួរតែបញ្ឈប់ការបដិបក្ខគ្នាជាមួយប្រទេសចិនលើវិស័យភូមិសាស្ត្រនយោបាយ ព្រោះមានតែប្រទេសទាំងពីរនេះចាប់ដៃគ្នា និងបង្កើនកិច្ចសហប្រតិបតិ្តការនោះទេ ទើបអាចធ្វើឱ្យសេដ្ឋកិច្ចសកលងើបឡើងវិញ ។
លោក Kishore Mahbubani សម្គាល់ឃើញថា រដ្ឋាភិបាលលោក បៃដិន គួរតែបញ្ឈប់ធ្វើសង្គ្រាមពាណិជ្ជកម្ម លុបចោលពន្ធគយទៅលើផលិតផលចិនដែលបានកំណត់ក្នុងអាណតិ្តនៃរដ្ឋាភិបាលរបស់លោកត្រាំ ក្នុងន័យផ្លាស់ប្តូរគោលនយោបាយចំពោះប្រទេសចិនក្នុងសម័យលោកត្រាំ ក៏ដូចជាជំរុញសេដ្ឋកិច្ចសកលឱ្យមានកំណើនជាថ្មីឡើងវិញ ។ បើពុំនោះសោត តំបន់នានានៅលើពិភពលោកសុទ្ធតែនឹងរងការវាយប្រហារពីការបដិបក្ខគ្នារវាងចិននិងអាមេរិកជាមិនខាន ។
លោក Kishore Mahbubani បានថ្លែងទៀតថា បណ្តាប្រទេសអាស៊ីនានាគួរតែរួមគ្នាចេញសេចកី្តថ្លែងការណ៍ អំពាវនាវឱ្យចិននិងអាមេរិកធ្វើកិច្ចសហប្រតិបតិ្តការ ក្នុងន័យជំរុញសេដ្ឋកិច្ចឱ្យងើបឡើងវិញ និងរួមគ្នាទប់ទល់នឹងបញ្ហាត្រូវដោះស្រាយជាបន្ទាន់ ដូចជាការរីករាលដាលនៃជំងឺកូវីដ១៩ និងអាកាសធាតុឡើងកម្តៅជាដើម ៕