ក្នុងពិធីបើកកិច្ចប្រជុំកំពូលអាកាសធាតុ លោក បៃដិន ប្រធានាធិបតីអាមេរិកបានប្រកាសថា នឹងបន្ថែមពាក្យសន្យាស្តីពីការកាត់បន្ថយការបញ្ចេញសារធាតុបំពុល ពោលគឺដល់ឆ្នាំ២០៣០ ការបញ្ចេញឧស្ម័នពីផ្ទះកញ្ចក់នឹងកាត់បន្ថយពី៥០ភាគរយដល់៥២ភាគរយ បើប្រៀបធៀបនឹងឆ្នាំ២០០៥ ហើយដល់ឆ្នាំ២០៥០ សម្រេចបាននូវគោលដៅមិនបញ្ចេញសារធាតុបំពុល ។ ប៉ុន្តែទាក់ទិននឹងពាក្យសន្យានេះ ប្រព័ន្ធសារព័ត៌មានអាមេរិកជាច្រើនគ្មានជំនឿចិត្តនោះទេ ហើយសង្កេតឃើញថា បំណុលដែលអាមេរិកបានជំពាក់លើវិស័យបម្រែបម្រួលអាកាសធាតុ មិនអាចសងវិញតាមរយៈការរៀបចំកិច្ចប្រជុំកំពូលតែមួយលើកនោះទេ ។
ថ្ងៃទី២១ កាសែត The Washington Post បានចុះផ្សាយដំណឹងថា ទោះបីជារដ្ឋាភិបាលលោកបៃដិនអាចរកបានតុល្យភាពលើវិស័យនយោបាយក្នុងស្រុកអំពីពាក្យសន្យាពាក់ព័ន្ធក៏ដោយ ក៏ប៉ុន្តែ ពាក្យសន្យាថ្មីនេះគ្រាន់តែជាឧបករណ៍មួយតែប៉ុណ្ណោះ ក្នុងន័យបោកបញ្ឆោតអង្គភាពសេដ្ឋកិច្ចផ្សេងទៀត ។
នាពេលថ្មីៗកន្លងទៅនេះ កាសែត ញូវយ៉ក ថាមស៍បានដកស្រង់ពាក្យសំដីរបស់លោក Taiya Smith អ្នកស្រាវជ្រាវជាន់ខ្ពស់នៃគណៈកម្មាធិការដឹកនាំការដោះស្រាយបញ្ហាអាកាសធាតុរបស់អាមេរិកថា “អាមេរិកត្រូវធ្វើការងារជាច្រើនសិន ទើបអាចធ្វើឱ្យបណ្តាប្រទេសនានាមានជំនឿចិត្តចំពោះអាមេរិក។ យើងចាំបាច់ត្រូវបញ្ជាក់ថា នេះមិនមែនគ្រាន់តែជាចំណងចំណូលចិត្តនៃនយោយបាយអាមេរិកក្នុងរយៈពេលដ៏ខ្លីនោះទេ ” ៕
