ថ្ងៃទី២០ខែមករា តាមម៉ោងក្នុងតំបន់ លោក ចូ បៃដិន ប្រធានាធិបតីអាមេរិកបានស្បថឡើងកាន់មុខតំណែងជាផ្លូវការ ។ ពេលមុននេះ ប្រព័ន្ធសារព័ត៌មានអាមេរិកធ្លាប់បានផ្សាយដំណឹងថា លោក បៃដិន គ្រោងនឹងតែងតាំងលោក Kurt Campbell អ្នកជំនាញជើងចាស់របស់អាមេរិកលើវិស័យគោលនយោបាយការទូតអាស៊ី ជាមន្ត្រីទទួលបន្ទុកកិច្ចការអាស៊ី ហើយមុខតំណែងមួយនេះជាមុខតំណែងថ្មីបន្ទាប់ពីលោកបៃដិនឡើងកាន់តំណែងជាប្រធានាធិបតី ។ ក្រៅពីនេះលោក Kurt Campbell លោក បៃដិននឹងតែងតាំងមន្ត្រី៣រូបទៀត សម្រាប់ដោះស្រាយដោយឡែកពីគ្នានូវកិច្ចការអាស៊ីប៉ាស៊ីហ្វិក ក្នុងនោះបូករួមទាំងបញ្ហាពាក់ព័ន្ធនឹងចិន ឥណ្ឌា ជប៉ុននិងកូរ៉េខាងត្បូងជាដើម ។
ទាក់ទិននឹងរឿងនេះ លោក Harry Harding អ្នកស្រាវជ្រាវជាន់ខ្ពស់នៃមជ្ឈមណ្ឌល Miller របស់សកលវិទ្យាល័យVirginia អាមេរិកបានថ្លែងថា មិនបាច់សង្ស័យឡើយ រដ្ឋាភិបាលរបស់លោកបៃដិនរំពឹងទុកឱ្យរៀបចំកិច្ចសន្ទនាជាថ្មីឡើងវិញជាមួយប្រទេសចិន ប៉ុន្តែ ទំនាក់ទំនងរវាងប្រទេសទាំងពីរអាចត្រូវបានកែលម្អឬអត់ បច្ចុប្បន្ននៅមិនអាចប៉ាន់ប្រមាណបានឡើយ ។
ចាប់តាំងពីលោកត្រាំបានឡើងកាន់មុខតំណែងមក ខ្លឹមសាររបស់ទំនាក់ទំនងរវាងចិននិងអាមេរិកបានប្រែពីកិច្ចសហប្រតិបតិ្តការទៅជាការប្រកួតប្រជែង ។ ក្នុងបរិបទដែលជម្លោះផ្នែកសេដ្ឋកិច្ចនិងពាណិជ្ជកម្មមានភាពកាន់តែស៊ីជម្រៅ អ្នកនយោបាយអាមេរិកមួយចំនួនដែលញៀនគំនិតសង្គ្រាមត្រជាក់ បានវាយប្រហារប្រទេសចិនយ៉ាងគឃ្លើនដោយមិនសំចៃដៃ ។ ប្រការនេះបណ្តាលឱ្យទំនាក់ទំនងរវាងចិននិងអាមេរិករំលេចនិន្នាការបដិបក្ខគ្នាដោយគ្រប់ជ្រុងជ្រោយ ។
លោក បៃដិនធ្លាប់ប្រកាសជាសាធារណៈថា គោលនយោបាយពាណិជ្ជកម្មចំពោះចិនរបស់លោក ត្រាំ មិនបានការទេ លោកចង់ស្វែងរកគោលនយោបាយពាណិជ្ជកម្មជាមួយប្រទេសចិនដែលអាចទទួលបានការវិវឌ្ឍរីកចម្រើនយ៉ាងពិតប្រាកដ ។ ជាការពិតណាស់ ប្រទេសចិនមិនអាចសម្គាល់ឃើញថា ជម្លោះផ្នែកសេដ្ឋកិច្ចនិងពាណិជ្ជកម្មរវាងចិននិងអាមេរិកជិតនឹងបញ្ចប់ ហើយបញ្ហាជារចនាសម័្ពន្ធរវាងចិននិងអាមេរិកក៏នឹងទទួលបានដំណោះស្រាយផងដែរ ។ ប៉ុន្តែ ការឡើងកាន់មុខតំណែងរបស់លោកបៃដិន ពិតជានឹងបញ្ឈប់នូវចង្វាក់នៃសង្រ្គាមពាណិជ្ជកម្មជាមួយចិនរបស់អាមេរិក ក៏ដូចជាបានផ្តល់នូវឱកាសនិងចន្លោះសម្រាប់រៀបចំឡើងវិញនូវទំនាក់ទំនងផ្នែកសេដ្ឋកិច្ចនិងពាណិជ្ជកម្មរវាងប្រទេសទាំងពីរផងដែរ ។
បើឈរលើមុំរបស់ប្រទេសចិន ការចៀសវាងពីការផ្តាច់ទំនាក់ទំនងផ្នែកសេដ្ឋកិច្ចនិងពាណិជ្ជកម្ម ចៀសវាងពីការធ្លាក់ក្នុងសង្គ្រាមត្រជាក់ គឺជាអាកប្បកិរិយារបស់ចិនយ៉ាងច្បាស់លាស់ជាប់រហូតមក។ ដោយប្រកាន់ខ្ជាប់ទំនួលខុសត្រូវនិងចិត្តស្មោះបែបនេះ នៅឆ្នាំ២០២០ រដ្ឋាភិបាលចិនបានពន្លឿនការជំរុញកិច្ចសហប្រតិបតិ្តការជាច្រើនលើវិស័យសេដ្ឋកិច្ចនិងពាណិជ្ជកម្ម ដោយឡែកនៅថ្ងៃទី១៥ ខែវិច្ឆិកា បានចុះហត្ថលេខាដោយជោគជ័យលើ « កិច្ចព្រមព្រៀងស្តីពីទំនាក់ទំនងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (អាសិប)» នៅថ្ងៃទី៣០ ខែធ្នូ បានសម្រេចបាននូវកិច្ចចរចាស្តីពីកិច្ចព្រមព្រៀងវិនិយោគរវាងចិននិងអឺរ៉ុប ។
រំពឹងថា លោកបៃដិន ដែលធ្លាប់ទទួលទានម៉ីសៀងនៅក្បែរវិមានស្គរកាលពី៩ឆ្នាំមុននៅក្រុងប៉េកាំងអាចស្តារទំនាក់ទំនងរវាងចិននិងអាមេរិកជាថ្មីឡើងវិញក្នុងឆ្នាំថ្មី ក្នុងន័យបង្វែរនិន្នាការធ្លាក់ចុះជាបន្តបន្ទាប់នៃទំនាក់ទំនងប្រទេសទាំងពីរ ព្រមទាំងធ្វើឱ្យប្រជាជននៃប្រទេសទាំងពីរក្លាយជាអ្នកទទួលបានផលប្រយោជន៍ពីការប្រកួតប្រជែងដ៏វិជ្ជមានរវាងប្រទេសទាំងពីរ ៕