ទាក់ទិននឹងករណីដែលរូបវិទូខាងនុយក្លេអ៊ែររបស់អ៊ីរ៉ង់ត្រូវបានធ្វើឃាត លោកស្រីHua Chunying អ្នកនាំពាក្យក្រសួងការបរទេសចិនបានថ្លែងក្នុងសន្និសីទសារព័ត៌មានជាប្រចាំកាលពីថ្ងៃទី៣០ខែវិច្ឆិកាថា ប្រទេសចិន មានការភ្ញាក់ផ្អើលយ៉ាងខ្លាំងចំពោះករណីដែលអ្នកវិទ្យាសាស្ត្រអ៊ីរ៉ង់បានស្លាប់ដោយសារការវាយប្រហារ ចិនថ្កោលទោសចំពោះបទឧក្រិដ្ឋដ៏ហិង្សាមួយនេះ ហើយសង្ឃឹមថាព្រឹត្តិការណ៍នេះនឹងត្រូវបានស៊ើបអង្កេតយ៉ាងហ្មត់ចត់។
លោកស្រី Hua Chunying បានសង្កត់ធ្ងន់ថា ប្រទេសចិនប្រឆាំងនូវរាល់សកម្មភាពដែលធ្វើឱ្យស្ថានការណ៍ក្នុងតំបន់មានភាពកាន់តែតានតឹងនិងបំផ្លាញសន្តិភាពនិងស្ថិរភាពក្នុងតំបន់។បច្ចុប្បន្ននេះ ស្ថានការណ៍ក្នុងតំបន់មានភាពស្មុគស្មាញនិងរសើបខ្លាំង ដូចនេះ គ្រប់ភាគីគួរតែធ្វើកិច្ចខិតខំប្រឹងប្រែងជាមួយគ្នាដើម្បីបន្ធូរបន្ថយភាពតានតឹងក្នុងតំបន់ ក៏ដូចជាគាំពារសន្តិភាពនិងស្ថិរភាពក្នុងតំបន់។៕
